O‘zbekiston prezidenti Shavkat Mirziyoyev va Ozarbayjon prezidenti Ilhom Aliyev Xiva shahriga tashrif buyurdi, deb xabar beradi davlat rahbarining matbuot xizmati.
21-iyun kuni bo‘lib o‘tgan muzokaralar yakunida Shavkat Mirziyoyev o‘zbek va ozar xalqlari munosabatlarining shonli tarixi bugungi ko‘p qirrali hamkorlik uchun mustahkam poydevor yaratganini ta’kidlagan edi. “Haqiqatan ham, qardosh xalqlarimiz azaldan bordi-keldi qilib, bir-birining madaniyatini boyitgan. 2500-yildan ziyod tarixga ega Xiva bunda muhim o‘rin tutgan. Shu jihatdan, O‘zbekiston va Ozarbayjon prezidentlarining bu qadimiy shaharga tashrifi katta ma’noga ega”, — deyiladi xabarda.
Ma’lumot uchun, Ichan qal’a nodir shahar-yodgorlik sifatida diqqatga sazovor. Bu yerda 120 dan ziyod me’moriy obidalar bor. Shu bois Xiva shahri 1990-yil 12-dekabrda UNESCO Madaniy meros ro‘yxatiga kiritilgan.
Ta’kidlanishicha, davlat rahbarlari Ota darvozadan kirib, Ko‘k minora, Ko‘hna ark saroyi, Sherg‘ozixon madrasasi, Juma masjidi, Tosh hovlini tomosha qildi, Allomalar muzeyi bilan tanishgan. Xorazmcha qo‘shiq va raqslar ijrosi mehmonlarga ko‘tarinki kayfiyat baxsh etgan.
Shuningdek, prezidentlar Ichan qal’a yaqinidagi Nurillaboy saroyini ham borib ko‘rgan. Bu majmuani 1884-yilda Xiva xoni Muhammad Rahimxon Feruz qurdirgan. Keyinchalik qo‘shimcha binolar ham barpo etilib, beshta hovlidan tashkil topgan. Saroyda ham sharqona, ham yevropacha uslubdagi arxitektura ajoyib tarzda uyg‘unlashgan. Yana bir e’tiborli jihati, XX asr boshlarida ko‘pgina siyosiy jarayonlar aynan shu saroyda kechgan.
“Xivaning davlatchilik va ilm-fan rivojida tutgan o‘rni, qadimiy obidalari va san’ati ozarbayjonlik mehmonlarda katta taassurot qoldirdi”, — deyiladi xabarda.
Avvalroq Shavkat Mirziyoyev va Ilhom Aliyev Faxriy mehmonlar xiyoboniga ko‘chat ekkani to‘g‘risida xabar berilgandi.
Ilhom Aliyev tashrifining birinchi kuni
Shavkat Mirziyoyev taklifiga binoan Ozarbayjon prezidenti Ilhom Aliyev 21-iyun kuni davlat tashrifi bilan O‘zbekistonga keldi. Ozarbayjon prezidentining O‘zbekistonga tashrifi Haydar Aliyev sharafiga nomlangan ko‘cha va uning yodgorligi ochilishidan boshlandi. Shundan so‘ng Ozarbayjon prezidenti Shavkat Mirziyoyev hamrohligida “Yangi O‘zbekiston” bog‘iga tashrif buyurib, Mustaqillik monumenti poyiga gul qo‘ydi.Keyinroq Ko‘ksaroyda Ilhom Aliyevni rasmiy kutib olish marosimi bo‘lib o‘tdi. Marosimda O‘zbekiston va Ozarbayjon rasmiy delegatsiyalari a’zolari ishtirok etdi. Avval tor doirada, so‘ng kengaytirilgan tartibda muzokaralar o‘tkazildi. Davlat rahbarlari strategik sheriklikni chuqurlashtirish va har tomonlama hamkorlikni kengaytirish to‘g‘risidagi deklaratsiyani imzoladi. Shundan so‘ng OAV uchun brifing o‘tkazildi.
Tashrif O‘zbekiston va Ozarbayjon prezidentlarining Toshkentdagi Texnoparkni borib ko‘rishi bilan davom etdi.
Izoh (0)