Ўзбекистон президенти Шавкат Мирзиёев ва Озарбайжон президенти Илҳом Алиев Хива шаҳрига ташриф буюрди, деб хабар беради давлат раҳбарининг матбуот хизмати.
21 июнь куни бўлиб ўтган музокаралар якунида Шавкат Мирзиёев ўзбек ва озар халқлари муносабатларининг шонли тарихи бугунги кўп қиррали ҳамкорлик учун мустаҳкам пойдевор яратганини таъкидлаган эди. «Ҳақиқатан ҳам, қардош халқларимиз азалдан борди-келди қилиб, бир-бирининг маданиятини бойитган. 2500 йилдан зиёд тарихга эга Хива бунда муҳим ўрин тутган. Шу жиҳатдан, Ўзбекистон ва Озарбайжон президентларининг бу қадимий шаҳарга ташрифи катта маънога эга», — дейилади хабарда.
Маълумот учун, Ичан қалъа нодир шаҳар-ёдгорлик сифатида диққатга сазовор. Бу ерда 120 дан зиёд меъморий обидалар бор. Шу боис Хива шаҳри 1990 йил 12 декабрда УНЕСCО Маданий мерос рўйхатига киритилган.
Таъкидланишича, давлат раҳбарлари Ота дарвозадан кириб, Кўк минора, Кўҳна арк саройи, Шерғозихон мадрасаси, Жума масжиди, Тош ҳовлини томоша қилди, Алломалар музейи билан танишган. Хоразмча қўшиқ ва рақслар ижроси меҳмонларга кўтаринки кайфият бахш этган.
Шунингдек, президентлар Ичан қалъа яқинидаги Нуриллабой саройини ҳам бориб кўрган. Бу мажмуани 1884 йилда Хива хони Муҳаммад Раҳимхон Феруз қурдирган. Кейинчалик қўшимча бинолар ҳам барпо этилиб, бешта ҳовлидан ташкил топган. Саройда ҳам шарқона, ҳам европача услубдаги архитектура ажойиб тарзда уйғунлашган. Яна бир эътиборли жиҳати, ХХ аср бошларида кўпгина сиёсий жараёнлар айнан шу саройда кечган.
«Хиванинг давлатчилик ва илм-фан ривожида тутган ўрни, қадимий обидалари ва санъати озарбайжонлик меҳмонларда катта таассурот қолдирди», — дейилади хабарда.
Аввалроқ Шавкат Мирзиёев ва Илҳом Алиев Фахрий меҳмонлар хиёбонига кўчат эккани тўғрисида хабар берилганди.
Илҳом Алиев ташрифининг биринчи куни
Шавкат Мирзиёев таклифига биноан Озарбайжон президенти Илҳом Алиев 21 июнь куни давлат ташрифи билан Ўзбекистонга келди. Озарбайжон президентининг Ўзбекистонга ташрифи Ҳайдар Алиев шарафига номланган кўча ва унинг ёдгорлиги очилишидан бошланди. Шундан сўнг Озарбайжон президенти Шавкат Мирзиёев ҳамроҳлигида «Янги Ўзбекистон» боғига ташриф буюриб, Мустақиллик монументи пойига гул қўйди.Кейинроқ Кўксаройда Илҳом Алиевни расмий кутиб олиш маросими бўлиб ўтди. Маросимда Ўзбекистон ва Озарбайжон расмий делегациялари аъзолари иштирок этди. Аввал тор доирада, сўнг кенгайтирилган тартибда музокаралар ўтказилди. Давлат раҳбарлари стратегик шерикликни чуқурлаштириш ва ҳар томонлама ҳамкорликни кенгайтириш тўғрисидаги декларацияни имзолади. Шундан сўнг ОАВ учун брифинг ўтказилди.
Ташриф Ўзбекистон ва Озарбайжон президентларининг Тошкентдаги Технопаркни бориб кўриши билан давом этди.
Изоҳ (0)