IT Park O‘zbekistonga ishlash uchun ko‘chib kelgan IT-mutaxassis Yevgeniy Krisanov haqida hikoyani taqdim etdi.
38 yoshli Yevgeniy Krisanov Itransition kompaniyasida PHP dasturchisi sifatida bir yildan beri ishlaydi.
Itransition Group (Itransition) - dasturiy yechimlarni ishlab chiqish va IT-konsalting sohasidagi xalqaro IT-kompaniya, Belarus yuqori texnologiyalar parkining (HTP) rezidenti va “Infopark” fan va texnologiya assotsiatsiyasining a’zosi.
U HTP rezident kompaniyalari orasida eng yirik beshta dasturiy ta’minot eksportchilaridan biridir. Itransition vakolatxonalari AQSH, Buyuk Britaniya, Niderlandiya, development markazi esa Belarusda joylashgan.
Yevgeniy sohaga kirib kelganiga ancha bo‘lgan. Dastlab u loyihalar bilan faqat o‘zi shug‘ullangan va sohadagi yangiliklarni o‘rgangan. Keyinchalik esa maxsus ta’limga ega bo‘lgan.
Men dasturlash asoslarini universitetdan ancha oldin o‘rgana boshlaganman. O‘qishni tugatgandan so‘ng, bir oz muddat tizim ma’mur sifatida ishladim, keyin o‘zimga yoqadigan internet va veb-saytlarni ishlab chiqishga o‘tishim kerak deb qaror qildim, — deydi u.
Shu yilning mart oyida Yevgeniy Rossiyadan O‘zbekistonga ko‘chib o‘tishga qaror qilgan.Undagi uchta variant bo‘lgan — Gruziya, Armaniston, O‘zbekiston. Toshkentda kompaniyasining ofisi ochilgani bois bu yerni tanlagan.
Yevgeniyning so‘zlariga ko‘ra, relokatsiya jarayoni oson kechgan, chunki o‘sha paytdagi yagona talab PZR testidan o‘tish va pasportga ega bo‘lish edi.
IT Park ko‘chishimga yordam berdi: meni aeroportda kutib olib yotoqxonaga joylashtirdi. Toshkentga kelganimning ikkinchi kunidayoq yashashga joy topdim. Ro‘yxatga olish va boshqa masalalar juda tez hal bo‘ldi, — deydi u.
U O‘zbekiston IT sohasi haqida chuqur ma’lumotga ega emas va faqat foydalanuvchi sifatida muammoli joylar mavjudligini aytishi mumkin. Masalan, bank ilovalarida yaxshilash kerak bo‘lgan jihatlar mavjud, chunki moliyaviy vositalar ishonchli bo‘lishi kerak.
Lekin unga ko‘ra, soha ancha rivojlangan, O‘zbekiston o‘z yo‘lidan ketayotgani aniq. Internet ishlashi sifat darajasida.
Qanday qilib O‘zbekistonni yoqtirmaslik mumkin? Bu yerda havo issiq, hammayoq ko‘klamzor, taomlar mazali. Aholisi xushmuomala, mehribon va xayrixoh. Kvartira borasida ham omadim keldi. Mahalliy aholining qo‘llarini ko‘ksiga qo‘yib, meni “aka” deb chaqirishi, ko‘nglimdan joy oldi, — deydi u.
Yevgeniy poytaxtning mashhur sayyohlik obidalarini ziyorat qilishga, gullar ko‘rgazmasiga tashrif buyurishga muvaffaq bo‘lgan. Hatto Amir Temur xiyobonida o‘zining sevimli qahvaxonasini ham topib, barista bilan do‘stlashgan.
U mahalliy bozorlardan, ayniqsa, Chorsuni eslashini, sharqona bozorlarni shunday tasavvur qilganini bildirgan. U yerga borishi bilanoq sotuvchilar darhol nimadir sotib olishni taklif qila boshlashi, qayerdan kelganimni so‘rashganini, hatto savdolashishga ham harakat qilib ko‘rganini eslaydi
Toshkent metrosi Yevgeniyda boshqacha taassurot qoldirgan — vaqti-vaqti bilan ushbu metroda sayr qilishni va poytaxt bekatlari go‘zalligini ko‘zdan kechirishni xush ko‘radi. Sevimli bekatlari orasida “Kosmonavtlar”, “Bodomzor”, “Paxtakor” va “Alisher Navoiy” bor.
Toshkentdan tashqari Samarqandga ham borishga muvaffaq bo‘lgan Yevgeniy shaharning diqqatga sazovor joylarini alohida hayajon bilan eslaydi.
Unga ko‘ra, Samarqand Toshkentdan juda farq qiladi. Poytaxt Rossiyaning zamonaviy yirik shaharlariga o‘xshash. Samarqand esa o‘ziga xos — sharqona, masalan, u yerda milliy kiyimlarni tez-tez uchratish mumkin.
Menga mamlakat, shahar yoqdi. Shu yerda qolish haqida o‘ylayapman. Lekin hamma narsani obdon o‘ylab ko‘rmoqchiman, jumladan, jazirama Toshkent yoziga dosh bera olamanmi yoki yo‘qmi, tushunmoqchiman. Bu mening yakuniy qarorimga ta’sir qiladigan asosiy mezonlardan biri, — deydi Yevgeniy.
Hozir Yevgeniy Toshkentdagi hayotning har bir daqiqasidan zavq olmoqda, bouling o‘ynaydi, turli viktorinalarda qatnashadi. Boz ustiga o‘zbek tilini ham o‘rganmoqchi.
Men hozirgacha bir nechta iboralarni va o‘ngacha sanashni o‘rgandim. Umuman o‘zbek tilini o‘rganmoqchiman. Agar shu yerda qolsam, tilni bilishim kerak. Agar ketsam, o‘zim bilan o‘zbek tili haqida ozgina bilim, Qo‘qon holvasi, do‘ppilarini olib ketaman, — deb so‘zini yakunlaydi.
Avvalroq 2022-yildagi istiqbolli IT kasblar ro‘yxati ma’lum bo‘lgan edi.
Izoh (0)