IT Park Ўзбекистонга ишлаш учун кўчиб келган IT-мутахассис Евгений Крисанов ҳақида ҳикояни тақдим этди.
38 ёшли Евгений Крисанов Itransition компаниясида PHP дастурчиси сифатида бир йилдан бери ишлайди.
Itransition Group (Itransition) - дастурий ечимларни ишлаб чиқиш ва IT-консалтинг соҳасидаги халқаро IT-компания, Беларусь юқори технологиялар паркининг (HTP) резиденти ва «Инфопарк» фан ва технология ассоциациясининг аъзоси.
У HTP резидент компаниялари орасида энг йирик бешта дастурий таъминот экспортчиларидан биридир. Itransition ваколатхоналари АҚШ, Буюк Британия, Нидерландия, девелопмент маркази эса Беларусда жойлашган.
Евгений соҳага кириб келганига анча бўлган. Дастлаб у лойиҳалар билан фақат ўзи шуғулланган ва соҳадаги янгиликларни ўрганган. Кейинчалик эса махсус таълимга эга бўлган.
Мен дастурлаш асосларини университетдан анча олдин ўргана бошлаганман. Ўқишни тугатгандан сўнг, бир оз муддат тизим маъмур сифатида ишладим, кейин ўзимга ёқадиган интернет ва веб-сайтларни ишлаб чиқишга ўтишим керак деб қарор қилдим, — дейди у.
Шу йилнинг март ойида Евгений Россиядан Ўзбекистонга кўчиб ўтишга қарор қилган.Ундаги учта вариант бўлган — Грузия, Арманистон, Ўзбекистон. Тошкентда компаниясининг офиси очилгани боис бу ерни танлаган.
Евгенийнинг сўзларига кўра, релокация жараёни осон кечган, чунки ўша пайтдаги ягона талаб ПЗР тестидан ўтиш ва паспортга эга бўлиш эди.
IT Park кўчишимга ёрдам берди: мени аэропортда кутиб олиб ётоқхонага жойлаштирди. Тошкентга келганимнинг иккинчи кунидаёқ яшашга жой топдим. Рўйхатга олиш ва бошқа масалалар жуда тез ҳал бўлди, — дейди у.
У Ўзбекистон IT соҳаси ҳақида чуқур маълумотга эга эмас ва фақат фойдаланувчи сифатида муаммоли жойлар мавжудлигини айтиши мумкин. Масалан, банк иловаларида яхшилаш керак бўлган жиҳатлар мавжуд, чунки молиявий воситалар ишончли бўлиши керак.
Лекин унга кўра, соҳа анча ривожланган, Ўзбекистон ўз йўлидан кетаётгани аниқ. Интернет ишлаши сифат даражасида.
Қандай қилиб Ўзбекистонни ёқтирмаслик мумкин? Бу ерда ҳаво иссиқ, ҳамма ёқ кўкламзор, таомлар мазали. Аҳолиси хушмуомала, меҳрибон ва хайрихоҳ. Квартира борасида ҳам омадим келди. Маҳаллий аҳолининг қўлларини кўксига қўйиб, мени «ака» деб чақириши, кўнглимдан жой олди, — дейди у.
Евгений пойтахтнинг машҳур сайёҳлик обидаларини зиёрат қилишга, гуллар кўргазмасига ташриф буюришга муваффақ бўлган. Ҳатто Амир Темур хиёбонида ўзининг севимли қаҳвахонасини ҳам топиб, бариста билан дўстлашган.
У маҳаллий бозорлардан, айниқса, Чорсуни эслашини, шарқона бозорларни шундай тасаввур қилганини билдирган. У ерга бориши биланоқ сотувчилар дарҳол нимадир сотиб олишни таклиф қила бошлаши, қаердан келганимни сўрашганини, ҳатто савдолашишга ҳам ҳаракат қилиб кўрганини эслайди
Тошкент метроси Евгенийда бошқача таассурот қолдирган — вақти-вақти билан ушбу метрода сайр қилишни ва пойтахт бекатлари гўзаллигини кўздан кечиришни хуш кўради. Севимли бекатлари орасида «Космонавтлар», «Бодомзор», «Пахтакор» ва «Алишер Навоий» бор.
Тошкентдан ташқари Самарқандга ҳам боришга муваффақ бўлган Евгений шаҳарнинг диққатга сазовор жойларини алоҳида ҳаяжон билан эслайди.
Унга кўра, Самарқанд Тошкентдан жуда фарқ қилади. Пойтахт Россиянинг замонавий йирик шаҳарларига ўхшаш. Самарқанд эса ўзига хос — шарқона, масалан, у ерда миллий кийимларни тез-тез учратиш мумкин.
Менга мамлакат, шаҳар ёқди. Шу ерда қолиш ҳақида ўйлаяпман. Лекин ҳамма нарсани обдон ўйлаб кўрмоқчиман, жумладан, жазирама Тошкент ёзига дош бера оламанми ёки йўқми, тушунмоқчиман. Бу менинг якуний қароримга таъсир қиладиган асосий мезонлардан бири, — дейди Евгений.
Ҳозир Евгений Тошкентдаги ҳаётнинг ҳар бир дақиқасидан завқ олмоқда, боулинг ўйнайди, турли викториналарда қатнашади. Боз устига ўзбек тилини ҳам ўрганмоқчи.
Мен ҳозиргача бир нечта ибораларни ва ўнгача санашни ўргандим. Умуман ўзбек тилини ўрганмоқчиман. Агар шу ерда қолсам, тилни билишим керак. Агар кетсам, ўзим билан ўзбек тили ҳақида озгина билим, Қўқон ҳолваси, дўппиларини олиб кетаман, — деб сўзини якунлайди.
Аввалроқ 2022 йилдаги истиқболли IT касблар рўйхати маълум бўлган эди.
Изоҳ (0)