Tashqi ishlar vaziri vazifasini bajaruvchi Vladimir Norov 20-iyun kuni Braziliyaning O‘zbekistondagi favqulodda va muxtor elchisi etib tayinlangan (qarorgohi Moskva shahrida) Rodrigo De Lima Baen Soaresni qabul qildi. Bu haqda TIV axborot xizmati xabar qildi.
Qayd etilishicha, Norov elchining ishonch yorliqlarini qabul qilib olib, yangi lavozimga tayinlangani bilan tabriklagan. Soares esa Braziliya hukumati O‘zbekistonga mintaqadagi muhim davlat sifatida qarab, respublika bilan aloqalarni har tomonlama rivojlantirishga tayyor ekanini ta’kidlagan.
Uchrashuvda siyosiy muloqotni jadallashtirish, shu jumladan, vazirliklararo maslahatlashuvlarni o‘tkazish, ikki mamlakat parlamentlari o‘rtasidagi aloqalarni kengaytirish, BMT, Amerika davlatlari tashkiloti doirasida va “BRICS+” formatida o‘zaro muvofiqlashtiruvni kuchaytirish, hamkorlikning shartnomaviy-huquqiy bazasini kengaytirish muhimligi qayd etilgan.
Iqtisodiy diplomatiyani faollashtirish maqsadida tomonlar Savdo-iqtisodiy va ilmiy-texnikaviy hamkorlik bo‘yicha hukumatlararo komissiya tuzish, o‘zaro asnoda savdo uylarini ochish, Braziliya ishbilarmon doiralari vakillarining O‘zbekistonga safarini tashkil etish masalalarini o‘rganib chiqishga kelishib olingan. Braziliya bozoriga O‘zbekistondan tovarlarni, shu jumladan, kimyoviy o‘g‘itlar, to‘qimachilik, agrar va boshqa turdagi mahsulotlarini yetkazib berishni yo‘lga qo‘yishga alohida e’tibor qaratilgan.
Madaniy-gumanitar yo‘nalishda O‘zbekiston va Braziliya madaniyati kunlarini o‘tkazish, ikki mamlakat shaharlari o‘rtasida birodarlik aloqalarini yo‘lga qo‘yish, turli tarmoqlarda mutaxassislar tayyorlash yuzasidan ta’lim va ilmiy muassasalar o‘rtasida hamkorlik o‘rnatish bo‘yicha takliflar ko‘rib chiqilgan.
Elchi braziliyalik kinokompaniyalar va san’at arboblarining navbatdagi “Ipak yo‘li durdonasi” Toshkent xalqaro kinofestivalida ishtirok etishga qiziqish bildirayotganini ma’lum qilgan.
Avvalroq Vladimir Norov Pokiston va Ummonning O‘zbekistondagi elchilari bilan uchrashgani, Vyetnamning O‘zbekistondagi yangi elchisidan ishonch yorliqlarini qabul qilgani haqida xabar qilingandi.
Izoh (0)