“O‘zgidromet” hafta davomida qanday ob-havo bo‘lishini ma’lum qildi

“O‘zgidromet”  20—24-iyunga ob-havo prognozini e’lon qildi.

Unga ko‘ra, 20-iyun kuni O‘zbekistonning markaziy, janubiy va sharqiy hududlar bo‘yicha vaqti-vaqti bilan yomg‘ir yog‘adi, tog‘ oldi va tog‘li hududlarda ba’zi joylarda yomg‘ir kuchli bo‘ladi. Ayrim joylarda do‘l yog‘ishi mumkin. Momaqaldiroq paytida shamol 18-23 metr/sekundgacha kuchayishi mumkin. Ba’zida 25-28 metr/sekundgacha kuchayishi, ayrim joylarda chang-to‘zonlari kuzatilishi mumkin. Kunduzgi harorat 23-28 darajani tashkil etadi. Bu ushbu kun iqlimiy me’yoridan 4-6 darajaga pastdir.

21—22-iyunda siklon ta’siri kuchsizlashadi, ammo markaziy, janubiy va sharqiy hududlar bo‘yicha momaqaldiroq bilan yomg‘ir yog‘ishi ehtimoli saqlanib turadi. Tog‘ oldi va tog‘li hududlarda ba’zi joylarda kuchli yomg‘ir yog‘adi, ayrim joylarda do‘l yog‘ishi mumkin.

20—22-iyunda respublikaning tog‘ oldi va tog‘li hududlarida sel-suv toshqin hodisalari yuzaga kelishi mumkin.

Haftaning ikkinchi yarmida respublika hududi bo‘yicha asosan yog‘ingarchiliksiz ob-havo bo‘lishi kutilmoqda, faqat ayrim tog‘ oldi va tog‘li hududlarning ba’zi joylarida qisqa muddatli yomg‘ir yog‘ishi kutilmoqda, momaqaldiroq bo‘lishi mumkin.

Kunduzi havo harorati asta-sekin ko‘tariladi va ish haftasining oxiriga kelib 34-39 darajani tashkil etadi.