Bu yil ilk yakkaxon konsert dasturini o‘tkazishga ahd qilgan xonandalar ko‘p bo‘ldi. Ular orasida Vohidjon Isoqov ham bor. U 14—15-iyun kunlari “Xalqlar do‘stligi” san’at saroyida “O‘zimning sevgilim” nomli dasturini taqdim etdi. “Daryo” muxbirlari konsertga tashrif buyurib, foto va videoreportaj tayyorladi.
Vohidjon Isoqov 1988-yili san’atkorlar oilasida dunyoga kelgan. U 2011-yildan buyon san’at maydonida o‘z o‘rnini topishga intilyapti. “Borolmadim”, “Eslagin”, “Salom, sevgim” qo‘shiqlari bilan xalq e’tiborini tortgan.
Ilk yakkaxon konsertida xonanda hayajonlanishi, kamchilik va xatolarga yo‘l qo‘yishi tabiiy hol. Vohidjon Isoqovning konserti ham kamchiliklardan xoli o‘tmadi. Olaylik, ko‘pchilik tomoshabinlarga konsert repertuari biroz tartibsiz joylangandek tuyuldi. Qo‘shiqlarni bir-biriga bog‘laydigan uyg‘unlik bo‘lmagani uchun dasturning birinchi bloki zerikarli o‘tdi.
Xonanda ham hayajonda ekanligini ko‘p bor takrorladi. Bunday holatda keyingi qo‘shiq nomini ham esdan chiqarib qo‘yganini to‘g‘ri tushunish mumkin.
O‘zbek konsertlaridagi an’anaga muvofiq xonanda konsertiga qiziqchi Zokir Ochildiyevni taklif etdi. U 10 daqiqalik tanaffus vaqtida tomoshabinlarni zeriktirmasligi kerak edi.
Yosh qiziqchilarning beldan past hazillaridan noliymiz-u, ammo ustoz darajasiga yetganlar ham shunday hazillar qilishsa, dardimizni kimga aytamiz?!
Konsertda raqsbop qo‘shiqlar juda ko‘p bo‘ldi. Ayniqsa, Vohidjon Isoqovning Sevinch Mo‘minova bilan kuylagan dueti sahnaga o‘zgacha kayfiyat olib kirdi.
Xonandani qo‘llab-quvvatlash uchun ko‘plab san’at vakillari ham tashrif buyurishdi. Mahmud Namozov, Davron Ergashev, Ahad Qayum, Sevinch Mo‘minova shular jumlasidandir.
Xonanda ustoz san’atkor Ravshan Namozovning qo‘shig‘ini kuylashdan avval xalqdan u kishining haqqiga duo qilishlarini, u ayni kunlarda og‘ir xastalik bilan kurashayotganini aytib o‘tdi.
Onasining vafotidan so‘ng sahnadan biroz yiroqlashgan opa-singil Muhabbat va Malika Qurbonovalar bu xonandaning konsertida ko‘rinishi berishdi. Faqat bu safar raqqosa sifatida emas, balki yangi tashkil etilgan “Muhabbat” ansamblining rahbari va xoreografi sifatida ishtirok etishdi. Malika Qurbonova shogirdlariga o‘rnak bo‘lish uchun sahnada o‘zbekona raqslardan birini ijro etdi.
Dasturni qiziqchi Ma’mur Xolmedov va aktrisa Shahzoda Muhammedovalar olib borishdi. Shahzodani qo‘llab-quvvatlash uchun turmush o‘rtog‘i Marat Xayrullayevich ham konsertga tashrif buyurdi.
Bundan tashqari, konsert davomida muxlislar bilan sovrinli o‘yinlar tanlovi ham o‘tkazildi.
Konsert ham bir imtihondek gap. Vohidjon Isoqov bu sinovdan o‘tishga jiddiy tayyorgarlik ko‘rganini payqash qiyin emas. Faqat u ko‘proq e’tiborini rang-barang kostyumlari-yu va muxlislarni jalb qilish usullariga qaratgan ko‘rinadi. Albatta, bu qaysidir tomoshabinlarga yoqar. Ammo konsert saroyiga borgan tomoshabin ko‘proq jonli ijroda qo‘shiq tinglashni istaydi, xonanda kelgusi dasturlarida bunga alohida e’tibor berishi kerak.
Mavzuga doir:
- Musiqiy bilimga ega bo‘lmagan, kliplari hech qachon telekanallarda ko‘rsatilmagan yulduz. Jaloliddin Ahmadaliyevning ilk yakkaxon konsertidan reportaj (foto, video)
- “Qizil olma”dan “Sanamgina”gacha: Yulduz Usmonovaning “80—90-yil хitlari” konsert dasturidan reportaj (foto va video)
- Ahad Qayumning o‘xshamagan piari, sahnani egallagan vaynchilar. Hamdam Sobirovning ilk yakkaxon konsertidan reportaj (video)
- “Benom” — Sarvar va Komil yangi dasturdagi kamchiliklar, Zahida bilan duet, “o‘xshamagan” konsertlari haqida (video)
- Sahnani qo‘riqlayotgan Halima va Mansur Agaliyevning ko‘z yoshlari. Yulduz Usmonovaning konsertidan reportaj (video)
- Jasur Umirovdan Farrux Zokirovgacha. “Sen aziz va muqaddassan, ayol” gala konsertidan reportaj (video)
Izoh (0)