Shavkat Mirziyoyev 15-iyun kuni aholini kasb-hunarga o‘qitish va monomarkazlar faoliyatini takomillashtirish chora-tadbirlari yuzasidan o‘tkazgan videoselektor yig‘ilishida O‘zbekiston o‘rta maxsus ta’lim tizimini tanqid qildi.
Prezident matbuot xizmatining qayd etishicha, yig‘ilishda 330 ta kasb-hunar maktabi, 173 ta kollej va 207 ta texnikuman iborat tizim samarali ishlatilmayotgani, uar mavjud quvvatlarining atigi 40-50 foizidan foydalanayotgani qayd etildi.
Ta’kidlanishicha, Energetika, Suv xo‘jaligi, Uy-joy kommunal vazirliklariga berilgan kollejlar 20 foiz, Qurilish, Transport vazirliklari kollejlari 10 foiz quvvatda ishlayapti. Joriy yilda kollej va texnikumlarning 15 mingga yaqin o‘quvchilari kontrakt pulini to‘lash imkoniyati yo‘qligi bois, o‘qishni davom ettira olmagan.
Shuningdek, kollej va texnikumlardagi kasblar ish beruvchilar talabiga mos emasligi, oqibatda ular ishga olgan yoshlarni qaytadan o‘qitishga majbur bo‘layotgani, o‘quv dasturlari esa zamon talablaridan ancha orqadaligi, 1 350 nomdagi kasbiy darslik va adabiyotlar yetishmasligi qayd etildi.
“Bu muammolar yechimi bilan shug‘ullanadigan mutasaddi vazirliklar tizimli ishlamayotgani tanqid qilindi. Shu bois kasb-hunar ta’limini zamon talablariga moslashtirish bo‘yicha yangi tizim joriy qilinishi belgilandi”, — deyiladi prezident matbuot kotibi xabarida.
Izoh (0)