“O‘zbekistonda mass-mediani rivojlantirishning dolzarb masalalari” mavzusida 14-iyun kuni davra suhbati bo‘lib o‘tdi. Unda Oliy Majlisi Senati, Qonunchilik palatasi vakillari, bir qator mutasaddi davlat organlari mas’ullari hamda xalqaro va nodavlat tashkilot rahbarlari, xorijiy va mahalliy OAV vakillari ishtirok etdi. Bu haqda “Daryo” muxbiri xabar bermoqda.
Tadbirda jurnalistlarning huquqini, shuningdek, ularni turli tazyiq va zo‘ravonliklardan himoya qilish, axborot olish va tarqatishda xolislikni ta’minlash, OAV xodimlari huquqiy savodxonligini oshirish, turli feyk xabarlar tarqalishini oldini olish, jurnalistik faoliyatda gender tenglik masalalari yoritilishi va sohadagi boshqa dolzarb masalalar yuzasidan fikr-mulohazalar bildirildi.
Davra suhbatida AOKA rahbari Asadjon Xo‘jayev nutq so‘zlarkan, davlat organlari faoliyatida ochiqlikni ta’minlash, tanqidlar va jamoatchilik fikriga o‘z vaqtida asosli munosabat bildirish yo‘nalishidagi ishlar haqida ma’lumot berdi.
Uning qayd etishicha, 2019-yilda tanqidiy-tahliliy materiallarga javob berish 12 foizni tashkil etgan bo‘lsa, bu ko‘rsatkich 2021-yilda 93 foizga yetgan. U agentlik faoliyati doirasida tashkil etilgan “Dialog maydonchasi”, 1213 qisqa raqamli Call-markaz, Media-advice platformalari orqali nafaqat soha vakillari, balki aholi ham o‘zlarini qiziqtirgan barcha masalalar bo‘yicha huquqiy javoblar, maslahatlar va tavsiyalar olish imkoniga egaligini ham ta’kidladi.
“Agentlik bu ishlar bilan cheklanib qolmaydi, tegishli idoralar va tashkilotlar bilan hamkorlikda so‘z erkinligini ta’minlash borasidagi izchil islohotlarni yanada takomillashtirish, davlat organlari ochiqligini kengaytirish, jurnalistlar va matbuot kotiblarining malakasini oshirish, axborot xizmatlarini faoliyatini yaxshilash va OAV bilan uzviy aloqalarini ta’minlashdagi sa’y-harakatlarini davom ettiradi”, — dedi Asadjon Xo‘jayev.
Tadbir davomida AOKA vakili milliy axborot qonunchiligini takomillashtirish va unifikatsiyalash masalalari, axborot kodeksini ishlab chiqish zarurati haqida ham gapirdi. Xususan, OAVni davlat ro‘yxatidan o‘tkazish tartibi, OAV mahsulotini tarqatish, raddiya berish va javob qaytarish huquqi va shu kabi bugunga qadar qonunchilikda aniqlik kiritilmagan qator tushunchalarga izoh berilayotganini ta’kidlab o‘tdi.
Izoh (0)