2022-yil yanvar—may holatiga ko‘ra O‘zbekistonda yangi tashkil etilgan IT kompaniyalari soni 964 ta bo‘ldi. Bu haqda Davlat statistika qo‘mitasidan ma’lum bo‘ldi.
O‘tgan yilning dastlabki 5 oyida 945 ta IT kompaniya tashkil qilingan edi.
Ayni paytda O‘zbekistonda 8 mingdan ortiq IT kompaniyalar faoliyat olib boradi.
Yil boshidan beri xorijiy kapital ishtirokida 120 nafar IT kompaniya tashkil qilindi. Bu ko‘rsatkich o‘tgan yilning shu davridagi 41 donadan qariyb 3 barobar ko‘pdir.
2022-yilning ilk besh oyida xorijiy IT kompaniyalarning umumiy sondagi ulushi 12,4 foiz bo‘ldi. O‘tgan yili bu ko‘rsatkich atigi 4,3 foiz bo‘lgan edi.
Bunga nima sabab bo‘lmoqda?
Bunday o‘sish Ukrainada urush boshlanishi bilan ko‘plab Rossiya va Belarus IT-kompaniyalarining boshqa davlatlarga, jumladan, O‘zbekistonga ko‘chib o‘tishga qaror qilgani bilan izohlanadi.
Bundan tashqari, 1-apreldan boshlab O‘zbekistonda TashRush dasturi ishga tushgan, uning doirasida IT Park xodimlari xorijiy IT-kompaniyalarga o‘z bizneslarini O‘zbekistonga ko‘chirishda yordam bermoqda.
O‘zbekistonga ko‘chib kelgan IT kompaniyalari orasida quyidagilar bor:
- Ravenage Games — kompyuter o‘yinlari nashriyoti. Kompaniya moliyalashtirish bilan ham shug‘ullanadi va o‘tgan yili 20 mln dollarlik fond tashkil qildi.
- Outer Space — Made on Earth Games o‘yinlarini ishlab chiqarish studiyasi. Kompaniya hozir 4X mobil strategiyasini ustida ishlamoqda.
- Fusionlabs — loyiha menejerlari va dasturchilarni tayyorlaydigan ProductStar kompaniyasi.
- ForCode — Diglex (matndan ma’lumot olish vositasi) va Robert Robot (texnik yordam xizmatlari uchun sun’iy intellekt) ishlab chiqaruvchisi.
- TopFactor — kompaniya xodimlarning ish faoliyatini boshqarishning avtomatlashtirilgan tizimlarini joriy etish bilan shug‘ullanadi.
- Okay QA — dasturiy ta’minotni sinovdan o‘tkazish va sifat nazorati kompaniyasi.
TashRush o‘zi qanday dastur?
TashRush dasturi chet el IT kompaniyalarini jalb qilish uchun ishlab chiqilgan va Tashkent Rush, ya’ni “Toshkent vasvasasi” degan qiyosiy nom tanlangan.
Bu o‘z vaqtida Kaliforniyada yuz bergan “Oltin vasvasasi”ni eslatadi. O‘sha vaqtda Kaliforniyada oltin koni topilgani haqida shov-shuv tarqalib, hamma u yerga oshiqa boshlagan bo‘lsa, hozir Toshkent ko‘plab IT-mutaxassislar talpinadigan makonga aylandi.
Dasturning asosiy maqsadi — xorijiy kompaniyalar o‘z jamoasini O‘zbekistonga relokatsiya qilishida ko‘maklashishdir. Ushbu loyiha bir necha bepul yordamlarni o‘z ichiga oladi. Xususan, mutaxassislarni aeroportda kutib olib, hamyonbop turar joy topishigacha yordam berish ham uning ichiga kiritilgan.
Izoh (0)