2022-yil 10-iyun kuni Toshkentda One Million Uzbek Coders O‘zbekiston va Birlashgan Arab Amirliklari qo‘shma loyihasi natijalariga bag‘ishlangan taqdirlash marosimi bo‘lib o‘tdi.
One Million Uzbek Coders loyihasi aholiga dasturlash va raqamli texnologiyalar bilan ishlashga oid ko‘nikmalarni taqdim etishga yo‘naltirilgan bepul onlayn platforma hisoblanadi.
Platforma ma’lumotlar tahlili (Data Analysis), Android dasturlash, front-end va full-stack dasturlash kabi to‘rtta eng ommabop yo‘nalishni o‘z ichiga oladi.
Bugungi kunga qadar One Million Uzbek Coders dasturi bo‘yicha ro‘yxatdan o‘tganlarning umumiy soni 2,5 mln nafarni tashkil etadi. Shulardan:
- 1 557 977 nafari ishtirokchi sertifikatiga;
- 1 175 933 nafari dasturni muvaffaqiyatli yakunlaganlik bo‘yicha sertifikatga ega bo‘ldi.
Umumiy ishtirokchilarning 90 foizini maktab o‘quvchilari, 47 foizini qizlar tashkil etadi.
Tadbir doirasida loyihani amalga oshirishda erishilgan yutuq va natijalar, axborot texnologiyalari sohasida professional rivojlanish uchun ilk qadam sifatida xizmat qilgan One Million Uzbek Coders bitiruvchilarining hikoyalari haqida videoroliklar namoyish etildi.
Nomzodlar quyidagi nominatsiyalar bo‘yicha taqdirlandi:
- “Eng faol hudud” – Xorazm viloyati;
- “Eng faol universitet” – Toshkent axborot texnologiyalari universiteti;
- “Eng faol maktab” – Qashqadaryo viloyati, 9-sonli o‘rta umumta’lim maktabi;
- “Eng faol mentor” — Toshboyev Bobomurod;
- “Eng faol talaba” – Farruh Saliyev, Toshkent axborot texnologiyalari universiteti;
- “Eng faol oila” – Xolovlar oilasi.
2021-yilda One Million Uzbek Coders bitiruvchilari uchun Birlashgan Arab Amirliklari bilan hamkorlikda umumiy mukofot jamg‘armasi 100 ming dollarni tashkil etuvchi 3 ta musobaqa, ya’ni Sport dasturlash, Open Data Challenge va Students Cup chempionatlari o‘tkazilgan edi.
Bundan tashqari, loyihaning faol ishtirokchilari o‘rtasida sovrin jamg‘armasi 6 ming dollarni tashkil etuvchi onlayn tanlov o‘tkazilib, unda 12 ming kishi ishtirok etdi.
2021-yilda One Million Uzbek Coders loyihasi doirasida malaka oshirish kurslarini tamomlagan umumta’lim maktablarining 100 nafar eng faol informatika fani o‘qituvchilari taqdirlandi.
One Million Uzbek Coders dasturi doirasida 7 ta saralash bosqichi o‘tkazilib, IT-ta’lim bo‘yicha 250 ta Nanodegree granti egalari aniqlandi.
Izoh (0)