Dunyodagi ikkinchi eng yirik kriptovalyuta efirium narxi bir yildan ortiq vaqt davomidagi eng minimal darajaga tushdi.
Coindesk ma’lumotlariga ko‘ra, so‘nggi 24 soat ichida efirium narxi 1436,18 dollargacha pasaygan.
Bugun, 13-iyunda Toshkent vaqti bilan soat 12:20 ga kelib kriptovalyuta taxminan 1327 dollarni tashkil qildi, bu avvalgi kunga nisbatan 9,1 foizga kam. Efirium kapitallashuvi 176,8 mlrd dollarni tashkil etdi.
Eng yirik kriptovalyuta — bitkoin 13-iyunda 12-maydan beri eng past darajaga tushib ketdi. Coindesk ma’lumotlariga ko‘ra, bitkoin narxi 27 266 dollargacha tushib ketdi.
Toshkent vaqti bilan soat 12:20 da u 25 285 dollardan sotildi, bu avvalgi kunga nisbatan 10,5 foizga kam. Bitkoin kapitallashuvi 522,2 mlrd dollarni tashkil etdi.
Kriptovalyuta bozorining qulashi sabablaridan biri Qo‘shma Shtatlardagi inflyatsiya bo‘yicha yangi statistika kutilganidan yuqori bo‘lgani hisoblanadi.
Statistik ma’lumotlar e’lon qilinganidan so‘ng, fond bozoridagi aksiyalarning qiymati ham pasayib ketdi va AQSHning ikki yillik g‘aznachilik obligatsiyalarining daromadliligi 2008-yildan beri maksimal darajaga ko‘tarildi.
Bundan tashqari kriptovalyuta bozoriga butun dunyo bo‘ylab markaziy banklar tomonidan pul-kredit siyosatining keskinlashuvi salbiy ta’sir ko‘rsatmoqda.
Izoh (0)