Криптовалюта бозорининг қулаши: эфириум ва биткоин нархи кескин тушиб кетди

Дунёдаги иккинчи энг йирик криптовалюта эфириум нархи бир йилдан ортиқ вақт давомидаги энг минимал даражага тушди.

Coindesk маълумотларига кўра, сўнгги 24 соат ичида эфириум нархи 1436,18 долларгача пасайган.

Бугун, 13 июнда Тошкент вақти билан соат 12:20 га келиб криптовалюта тахминан 1327 долларни ташкил қилди, бу аввалги кунга нисбатан 9,1 фоизга кам. Эфириум капиталлашуви 176,8 млрд долларни ташкил этди.

Энг йирик криптовалюта — биткоин 13 июнда 12 майдан бери энг паст даражага тушиб кетди. Coindesk маълумотларига кўра, биткоин нархи 27 266 долларгача тушиб кетди.

Тошкент вақти билан соат 12:20 да у 25 285 доллардан сотилди, бу аввалги кунга нисбатан 10,5 фоизга кам. Биткоин капиталлашуви 522,2 млрд долларни ташкил этди.

Криптовалюта бозорининг қулаши сабабларидан бири Қўшма Штатлардаги инфляция бўйича янги статистика кутилганидан юқори бўлгани ҳисобланади.

Статистик маълумотлар эълон қилинганидан сўнг, фонд бозоридаги акцияларнинг қиймати ҳам пасайиб кетди ва АҚШнинг икки йиллик ғазначилик облигацияларининг даромадлилиги 2008 йилдан бери максимал даражага кўтарилди.

Бундан ташқари криптовалюта бозорига бутун дунё бўйлаб марказий банклар томонидан пул-кредит сиёсатининг кескинлашуви салбий таъсир кўрсатмоқда.