Шавкат Мирзиёев 10 июнь куни Бирлашган Араб Амирликларининг ҳукумат ишлари бўйича вазири Муҳаммад бин Абдуллоҳ ал-Гаргавий бошчилигидаги делегацияни қабул қилди. Бу ҳақда Президент матбуот хизмати хабар қилди.
Қайд этилишича, учрашувда Ўзбекистон ва БАА ўртасидаги кўп қиррали ҳамкорликни ривожлантириш ва бойитишнинг долзарб масалалари кўриб чиқилган. Вазир Муҳаммад ал-Гаргавий давлат раҳбарига Амирликлар президенти Шайх Муҳаммад ал-Наҳаён ва БАА бош вазири, Дубай амирлиги ҳокими Шайх Муҳаммад ал-Мактумнинг саломи ва тилакларини етказган.
Бирлашган Араб Амирликлари ҳукумати Ўзбекистонда амалга оширилаётган янгиланишлар дастурини ҳар томонлама қўллаб-қувватлаётгани, унинг самарали рўёбга чиқарилишида зарур кўмакни кўрсатишга тайёрлиги таъкидланган. Музокаралар чоғида давлат бошқаруви самарадорлигини ошириш борасидаги, «Бир миллион дастурчи» дастури ва Ижтимоий-иқтисодий ислоҳотлар акселератори фаолияти доирасидаги ҳамкорликнинг амалий натижалари қайд этилган.
Инновациялар ва сунъий интеллект соҳаларида ҳамкорлик қилиш, муҳим тармоқларни ислоҳ қилиш, давлат бошқарувини янада такомиллаштириш ва замонавий кадрларни тайёрлаш юзасидан мулоқотни кенгайтириш узоқ муддатли шерикликнинг янги йўналишлари сифатида белгиланган. Қабул қилинган қарорлар ва учрашувда илгари сурилган ташаббусларни тўлиқ амалга ошириш бўйича қўшма «йўл харитаси»ни қабул қилишга келишиб олинган.
Изоҳ (0)