Shavkat Mirziyoyev “Hududlarda maxsus iqtisodiy va kichik sanoat zonalarini tashkil qilish va ularni muhandislik-kommunikatsiya infratuzilmasi bilan ta’minlash chora-tadbirlari to‘g‘risida”gi qarorni imzoladi. Qaror bilan maxsus iqtisodiy zonalarni tashqi muhandislik-kommunikatsiya tarmoqlari — gaz, elektr energiyasi, suv va kanalizatsiya tarmoqlari bilan ta’minlash bo‘yicha maqsadli chora-tadbirlar dasturi tasdiqlangan.
Shavkat Mirziyoyev raisligida 26-may kuni o‘tkazilgan yig‘ilishda sanoat zonalarini rivojlantirish borasida hududlarda qilinadigan ishlar ko‘pligi ko‘rsatib o‘tilgandi. O‘shanda sanoat zonalari maydonlarining 37 foizi elektr, suv, gaz, yo‘l va kanalizatsiya bilan ta’minlanmagani tanqid qilingan.
27-may kuni prezident raisligida bo‘lib o‘tgan yig‘ilishda sanoat sohasi rahbarlari kichik sanoat zonalarining bosh rejalari ishlab chiqilmagani, loyihalarni amalga oshirishda sustkashlikka yo‘l qo‘yilayotgani, to‘qimachilik va charm mahsulotlari ishlab chiqarishni joriy eta olmayotgani kabi kamchiliklar muhokama qilingan edi. Oqava suvlarni tozalash inshootlarining yo‘qligi, sanoat zonalarining uchdan bir qismidan ko‘prog‘ini elektr energiyasi, gaz, kanalizatsiya va yo‘llarning yo‘qligi, yer va binolarga egalik qilish masalalari hal etilmagani qayd etilgan.
Yig‘ilishda, shuningdek, sanoat zonalarida 6600 gektarlik bo‘sh yer maydoni elektr energiyasi, suv, yo‘l va boshqa shart-sharoitlar bilan ta’minlanishi, buning uchun 1,5 trillion so‘m sarflanishi ta’kidlangandi.
“Gazeta.uz”ning yozishicha, 6-iyundagi qaror bilan 2022-yilda tashqi muhandislik-kommunikatsiya tarmoqlarini erkin iqtisodiy zonalari (EIZ), kichik sanoat zonalari (KSZ), yoshlar sanoat va ishbilarmonlik zonalariga to‘g‘ridan to‘g‘ri xorijiy va mahalliy investitsiyalar ishtirokida ulashning umumlashtirilgan parametrlari tasdiqlangan.
Shuningdek, 2022-yilda hududlarda qishloq xo‘jaligiga mo‘ljallanmagan 363,29 gektar maydonda 104 ta yangi KSZ tashkil etish rejalashtirilgan. 2023-yilda va undan keyin yana 100 ta kichik sanoat zonalarini qurish rejalashtirilgan.
KSZ bosh rejalari loyihalarini ishlab chiqish mahalliy budjet va tadbirkorlik infratuzilmasini rivojlantirish hududiy jamg‘armalari hisobidan amalga oshiriladi. Obyektlarni moliyalashtirish yetkazib beruvchi tashkilotlar tomonidan taqdim etilgan texnik shartlar asosida KSZ uchun bosh rejalar ishlab chiqilgandan so‘ng amalga oshiriladi.
Izoh (0)