“Liverpul” urugvaylik futbolchi uchun 100 mln yevro sarflashga tayyor

“Benfika” klubi hujumchisi Darvin Nunyes faoliyatini “Liverpul”da davom ettirishi mumkin.

Mersisaydliklar rahbariyati Darvin Nunyes uchun “Benfika”ga 100 million yevro to‘lashga tayyor. “Liverpul” Portugaliya klubiga rasmiy taklif jo‘natgan. Agar transfer amalga oshsa, urugvaylik hujumchi klub tarixidagi eng qimmat futbolchiga aylanadi. Hozircha “Liverpul”ning eng qimmat transferi Virjil van Deyk hisoblanadi. Jamoa himoyachi uchun “Sauthempton”ga 88 million yevro to‘lagan.

2021/22-yilgi mavsumda Nunyes “Benfika” safida barcha musobaqalarda 41 ta o‘yinda ishtirok etib, 34 ta gol muallifiga aylandi. Urugvaylikka “Real” va “Tottenhem” ham qiziqish bildirmoqda. Avvalroq Darvin Chempionlar Ligasida ishtirok etishni maqsad qilgani uchun “Manchester Yunayted”ga rad javobini bergandi.

Nunyes 2019-yil oktabr oyida Urugvay terma jamoasi safida debyutini nishonlagan. Shu vaqtga qadar 11 ta o‘yinda ishtirok etib, 2 ta golga mualliflik qildi.