«Ливерпуль» уругвайлик футболчи учун 100 млн евро сарфлашга тайёр

«Бенфика» клуби ҳужумчиси Дарвин Нуньес фаолиятини «Ливерпуль»да давом эттириши мумкин.

Мерсисайдликлар раҳбарияти Дарвин Нуньес учун «Бенфика»га 100 миллион евро тўлашга тайёр. «Ливерпуль» Португалия клубига расмий таклиф жўнатган. Агар трансфер амалга ошса, уругвайлик ҳужумчи клуб тарихидаги энг қиммат футболчига айланади. Ҳозирча «Ливерпуль»нинг энг қиммат трансфери Виржил ван Дейк ҳисобланади. Жамоа ҳимоячи учун «Саутҳэмптон»га 88 миллион евро тўлаган.

2021/22 йилги мавсумда Нуньес «Бенфика» сафида барча мусобақаларда 41 та ўйинда иштирок этиб, 34 та гол муаллифига айланди. Уругвайликка «Реал» ва «Тоттенҳэм» ҳам қизиқиш билдирмоқда. Аввалроқ Дарвин Чемпионлар Лигасида иштирок этишни мақсад қилгани учун «Манчестер Юнайтед»га рад жавобини берганди.

Нуньес 2019 йил октябрь ойида Уругвай терма жамоаси сафида дебютини нишонлаган. Шу вақтга қадар 11 та ўйинда иштирок этиб, 2 та голга муаллифлик қилди.