“Diplomni bir joydan olish kerak” – oliy ta’lim vaziri o‘qishni ko‘chirishga 2 ta shart bilan ruxsat berilishini aytdi

Endilikda talabalarning o‘qishni ko‘chirishiga faqat 2 ta shart bilan ruxsat beriladi. Bu haqda bugun, 7-iyun kuni o‘tkazilayotgan Oliy Majlis qonunchilik palatasi yig‘ilishida Oliy ta’lim vaziri Abduqodir Toshqulov aytib o‘tdi.

Abduqodir Toshqulovning ta’kidlashicha, o‘qishni ko‘chirishda firibgarlik avj olmoqda.

“Endi o‘qishni ko‘chirish 2 ta shart bilan amalga oshadi: faqat turmush qursa va davlat xizmatchisi ishi boshqa joyga o‘tsa. Vazirning xati bilan. Biz bu yil shunga ruxsat oldik. Boshqa har qanday holatda akadem mobillikni qo‘llaymiz. Biz firibgarlarga yo‘l ochib bermasligimiz kerak. Har qanday imtiyoz firibgarlarga imkoniyat bo‘lib qolmoqda. O‘tgan yili 60 ming talaba o‘qishini ko‘chirishga hujjat topshirgan. Tuproqshunoslikka topshiryaptida maqsadi biologiyada o‘qish. Talaba birinchi bosqichdan maqsadini belgilab olishi kerak. Undan oldin tashxis maktablari ishlashi lozim. Ota-ona ishlashi kerak. Bu yil 150 ming talaba o‘qishini ko‘chirishiga prognoz bor edi. Bu narsaga barham berilyapti. Ta’lim tizimida 25-30 yildan beri ishlayotgan odam sifatida aytamanki, diplomni bir joydan olish kerak, butun dunyoda shunaqa”, – dedi vazir.

Avvalroq Abduqodir Toshqulov 2026-yilgacha oliy ta’lim muassasalari sonini 200 taga yetkazilishini aytgandi.