Toshkentning Mirzo Ulug‘bek tumanidagi dehqon bozoriga 132 kilo iste’molga yaroqsiz go‘sht sotish uchun olib kirilayotganida to‘xtatib qolindi.
Ma’lum bo‘lishicha, tumandagi “Navro‘z dehqon bozori”ga savdo maqsadida noma’lum shaxs 132 kilogrammlik go‘sht mahsulotlarini olib kirayotganida Sanitariya-epidemiologik osoyishtalik va jamoat salomatligi xizmati Mirzo Ulug‘bek tumani tumani bo‘limi va veterinariya sanitariya-epidemiologik laboratoriyasi xodimlari tomonidan to‘xtatilgan.
Olib borilgan tekshirishlar natijasiga ko‘ra mahsulot savdo va iste’mol uchun yaroqsiz ekani aniqlangan va holat yuzasidan bayonnoma tuzilib, IIB xizmati kinologiya bo‘linmasiga topshirilgan.
Bundan avval Toshkentdagi Chorsu bozorida iste’molga yaroqsiz go‘sht va sut mahsulotlari aniqlanib, yo‘q qilingani haqida xabar berilgandi.
Veterinariya va chorvachilikni rivojlantirish davlat qo‘mitasi boshqarma boshlig‘i Alisher Safarov 2022-yilning o‘tgan davri mobaynida poytaxt dehqon bozorlarida 6,8 tonna go‘sht va go‘sht mahsulotlari, 4,7 tonna sut va sut mahsulotlari iste’molga yaroqsiz ekani aniqlanib, zararsizlantirib yo‘qotilganini ma’lum qilgandi.
Izoh (0)