Toshkent shahar, Bektemir tumanida joylashgan “Bektemir-spirt eksperimental zavodi”ning 51 foiz davlat aksiyalari kimoshdi savdosida sotildi. Bu haqda Davlat aktivlarini boshqarish agentligi xabar berdi.
“Bektemir-spirt eksperimental zavodi” 2007-yilda tashkil etilgan. Asosiy yo‘nalishi — iste’mol qilinadigan etil spirtini ishlab chiqarish va sotish.
Ustav kapitali 21 mlrd so‘m bo‘lib, nominal qiymati 500 so‘m bo‘lgan 42 mln dona oddiy aksiyalarga bo‘lingan.
2021-yil IV chorak yakuni bo‘yicha kompaniya sof aktivlari qiymati 60,8 mlrd so‘mni tashkil etadi. Joriy yil zavodda jami 113,7 mlrd so‘mlik 1 mln 500 ming dekalitr spirt ishlab chiqarish rejalashtirilgan.
Taxminiy hisob-kitoblarga ko‘ra, sotishdan olingan sof tushum 82,79 mlrd so‘mni, yillik sof foyda esa 7,5 mlrd so‘mni tashkil qilishi kerak.
Zavodning 51 foiz aksiyalariga “Toshkentvino” 48,8 mlrd taklif qilib, auksion g‘olibi bo‘ldi.
“Toshkentvino” zavodi “O‘zvinsanoat” xolding kompaniyasi korxonalari orasidagi ko‘p tarmoqli korxona. O‘zining 4 ta zavodida yiliga 6,5 mln dekalitrdan ortiq aroq va alkogolli ichimliklar ishlab chiqaradi.
Avvalroq MIB Toshkent viloyatidagi spirtli ichimliklar ishlab chiqarish zavodini auksionga qo‘ygani haqida xabar berilgan edi.
Izoh (0)