Qozog‘iston mamlakatga vaqtincha kelgan chet elliklar uchun soliq to‘lovchining identifikatsiya raqami (STIR) berishni to‘xtatdi. Bu haqda Orda.kz xabar berdi.
Bu, birinchi navbatda, rossiyaliklarga tegishli. Visa va Mastercard Rossiyada faoliyatini to‘xtatganidan so‘ng, rossiyaliklar xalqaro kartalarni ochish uchun Qozog‘istonga borishgan (STIRsiz karta ochish imkoni yo‘q).
Buning natijasida 2022-yilning mart oyidan beri Rossiyaning 35 782 nafar fuqarosi Qozog‘istonda STIR olgan (o‘tgan yilning shu davriga nisbatan 16 barobar ko‘p).
Rossiyaliklar nafaqat Qozog‘iston, balki boshqa davlatlarga ham karta ochish uchun sayohat qilmoqda. Bunday davlatlarning ichida O‘zbekiston ham bor.
Talab yuqoriligi sabab, Rossiyada hatto “Visa uchun O‘zbekistonga sayohat” nomli turistik xizmatlar yo‘lga qo‘yilgan edi.
Hozirda O‘zbekistonda nechta chet ellik karta ochganligi bo‘yicha ma’lumot yo‘q. Lekin “Daryo” suhbatlashgan mutaxassislar bu ko‘rsatkich 10-15 ming odam atrofida bo‘lishi mumkinligini ta’kidlagan.
Izoh (0)