Buxoro shahrida 26—27-may kunlari o‘tkazilayotgan O‘zbekiston kambag‘allikni qisqartirish xalqaro forumining ochilish marosimi bo‘lib o‘tdi. Bu haqda “Daryo” muxbiri xabar bermoqda.
Forum kambag‘allikni qisqartirish, insonlar hayoti sifatini oshirish, barqaror rivojlanish maqsadlariga erishish yuzasidan O‘zbekistonda amalga oshirilgan ishlar va istiqboldagi rejalarni dunyo va mintaqa ekspertlari bilan birgalikda muhokama qilish hamda fikr almashish, xalqaro tashkilotlar bilan hamkorlik aloqalarini yanada mustahkamlash maqsadida tashkil etilmoqda.
Forum avvalida ishtirokchilarga prezident Shavkat Mirziyoyevning tabrigi o‘qib eshittirildi. Qayd etilishicha, Xalqaro tadbirda 250 ga yaqin qatnashchilar, shu jumladan, Shanxay hamkorlik tashkilotiga a’zo, kuzatuvchi va hamkor davlatlar, xalqaro rivojlanish institutlari, akademik doiralar va boshqa xorijiy mamlakat hamda tashkilotlarning jami 100 dan ortiq vakillari ishtirok etmoqda.
Xususan, forumda BMTning Taraqqiyot dasturi (BMTTD) bosh kotib o‘rinbosari va yordamchi ma’muri Usha Rao-Monari, Jahon bankining Yevropa va Markaziy Osiyo bo‘yicha mintaqaviy direktori Lalita Murti, Turk siyosatchisi, Turkiyaning sobiq moliya va g‘aznachilik vaziri Lutfi Elvan, Jorj Vashington universiteti xalqaro biznes amaliyoti professori Denni Leypsiger, SHHT bosh kotibi Chjan Min, Kambag‘allik va inson taraqqiyoti bo‘yicha Oksford tashabbusi direktori Sabina Alkayr, Xitoy xalqaro kambag‘allikni qisqartirish markazi direktori Lyu Junvenning ishtiroki ko‘zda tutilgan.
Shuningdek, tadbirda BMT, Islom taraqqiyot banki, Xalqaro valyuta jamg‘armasi, UNICEF, Fransiya taraqqiyot agentligi, Osiyo taraqqiyot banki, BMTning oziq-ovqat va qishloq xo‘jaligi tashkiloti, Global yashil o‘sish instituti kabi xalqaro tashkilot va moliya institutlari vakillari ham qatnashadi.
Shu bilan birga, forumda mahalliy tadbirkorlar, xususan, ushbu sohada muvaffaqiyatga erishgan yoshlar ishtirokida motivatsion panel sessiyasi tashkil etiladi. Ushbu tadbirda ilg‘or tajribadan o‘rnak olish va o‘rganish, kelajakka ishonishning ahamiyati, ishtiyoq, ijobiy fikrlash va optimistik xatti-harakatlar yuzasidan fikr almashiladi. Forumda 10 ta panel sessiyalari ham o‘tkazilishi rejalashtirilgan.
Izoh (0)