2022-yilning 18-may kuni “O‘zbekiston neft va gazi — OGU 2022” 24-xalqaro ko‘rgazmasi doirasida “ShGKMning ishlab chiqarish quvvatlarini kengaytirish” loyihasi bo‘yicha Enter Engineering Pte. Ltd. hamda Yevropaning bosh eksportchisi hisoblangan Jebsen & Jessen Industrial Solutions kompaniyasi va mazkur loyiha buyurtmachisi “Sho‘rtan GKM” MChJ o‘rtasida uch taraflama bitimning tantanali imzolanish marosimi bo‘lib o‘tdi.
Yevropa banklaridan eksport kredit agentliklari (EKA)ning sug‘urtaviy kafolati ostida Yevropa banklari moliyalashtiruvini jalb etish maqsadida, ushbu loyiha buyurtmasichi tomonidan Jebsen & Jessen Industrial Solutions kompaniyasi bosh eksportchi sifatida tanlab olindi. Bu kompaniya transport, elektron mobillik, metall olish sohalarida moliyaviy yechimlar taqdim etishga ixtisoslashgan. Kompaniyaning yillik aylanmasi 3 milliard yevrodan oshadi. Jebsen & Jessen eksport moliya amaliyotlarini yo‘lga qo‘yish borasida katta tajribaga ega bo‘lib, eksport kredit agentliklari ishtirokida 100 dan ortiq loyihalarni amalga oshirgan. Ta’kidlash joizki, 2021-yil noyabr oyidan boshlab, Enter Engineering Pte. Ltd. yevropalik tarkibni tayyorlash, EKA talablariga hamda Enter Engineering manfaatlariga mos istiqbolli shartnomalar shartlarini ishlab chiqish ustida ish boshladi.
Bosh eksportchi bilan uzoq muddatli kelishuv ishlari yakuniga ko‘ra, Germaniya, Italiya va Fransiya EKA’lari ishtirokida moliyalashtirilishi ko‘zda tutilgan 530 million dollarlik yetkazmalar hajmi belgilab olindi. Jebsen & Jessen kompaniyasining Enter Engineering bilan bitimi doirasidagi asosiy vazifalari moliyalashtirish tuzilmasini tayyorlash, EKA sug‘urta qoplamasini tashkil etish va Yevropa banklari tomonidan moliyalashtiriladigan yetkazmalar to‘g‘risidagi shartnomalarni jamlashdan iborat.
Shartnomalarning muvaffaqiyatli imzolanishi Yevropaning Deutsche Bank AG, Landesbank Hessen-Thüringen Girozentrale, Landesbank Baden-Württemberg va Unicredit Bank AG kabi yirik banklaridan uskunalarni sotib olish va yetkazib berish uchun zarur bo‘lgan moliyalashtiruvga erishish imkonini beradi.
Kelishuv imzolanishi jarayonida “O‘zbekneftgaz” AJ boshqaruvi raisining birinchi o‘rinbosari Sh. Alirizayev, “O‘zbekneftgaz” AJ boshqaruvi raisining transformatsiya masalalari bo‘yicha birinchi o‘rinbosari v.b. B. Usmonov va Enter Engineering “UNG-2” direksiyasi direktori B. Umarovlar tomonidan Jebsen & Jessen Industrial Solutions va Jebsen & Jessen Hamburg guruhi moliyaviy direktori Ralf Schfarzhaupt boshchiligidagi delegatsiya a’zolari bilan muzokaralar olib borildi. Tomonlar erishilgan natijadan mamnunliklarini hamda kelgusidagi hamkorlikni har tomonlama qo‘llab-quvvatlashga tayyorliklarini bildirishdi.
Ma’lumot sheriklik huquqi asosida tayyorlandi.
Izoh (0)