24 май куни ташқи ишлар вазири вазифасини бажарувчи Владимир Норов Ўзбекистонга ташриф буюрган АҚШ давлат котибининг Жанубий ва Марказий Осиё ишлари бўйича ёрдамчиси Дональд Лу билан учрашув ўтказди. Бу ҳақда ТИВ матбуот хизмати хабар берди.
Томонлар турли соҳалардаги Ўзбекистон—АҚШ муносабатларининг бугунги ҳолати ва ривожланиш истиқболларини муҳокама қилган.
Америка томони Ўзбекистонда президент Шавкат Мирзиёев раҳбарлигида амалга оширилаётган ўзгаришларни, шунингдек, мамлакатнинг амалий ва очиқ ташқи сиёсат йўлини юксак баҳолаган. АҚШ ҳукумати Ўзбекистонда ислоҳотлар жараёнига фаол кўмаклашишга тайёрлиги таъкидланган.
«Сўнгги йилларда сиёсий мулоқотни фаол тус олгани мамнуният билан қайд этилди. Йиллик маслаҳатлашувлар механизмини Стратегик шериклик мулоқотига айлантириш тўғрисидаги қарор ва унинг биринчи мажлиси 2021 йили Тошкент шаҳрида муваффақиятли ўтказилиши икки томонлама алоқалар тарихида муҳим воқеа бўлди ва томонларнинг ўзаро ҳамкорликни комплекс ривожлантиришга тайёрлигини кўрсатди», — дейилади хабарда.
Шунингдек, Вашингтон шаҳрида Стратегик шериклик мулоқотининг навбатдаги сессиясини ва унинг экспертлар даражасидаги соҳавий учрашувларини ўтказишга пухта тайёрларлик кўриш муҳимлиги қайд этилган.
Ўзбекистон ва Қўшма Штатларнинг инфратузилма, энергетика, транспорт, атроф-муҳитни муҳофаза қилиш ва иқлим ўзгаришига қарши кураш соҳаларида аниқ натижаларга эришиш мақсадида «C5+1» шаклидаги ҳамкорликни давом эттиришдан манфааотдорлиги таъкидланган.
Бундан ташқари, минтақавий ва халқаро масалалар юзасидан ҳам фикр алмашилган. Ўзбекистоннинг Афғонистонга гуманитар ёрдам кўрсатиш, ушбу мамлакатда узоқ муддатли тинчлик ўрнатиш ва унинг иқтисодий тикланишига ёрдам берадиган лойиҳаларни илгари суриш борасидаги саъй-ҳаракатлари юксак баҳоланган.
Эслатиб ўтамиз, 2021 йил 13 декабрь куни собиқ ташқи ишлар вазири Абдулазиз Комилов Ўзбекистон билан АҚШ ўртасидаги Стратегик шериклик мулоқотининг биринчи мажлисида иштирок этиш учун Тошкент шаҳрига келган АҚШ давлат котибининг Жанубий ва Марказий Осиё масалалари бўйича ёрдамчиси Дональд Лу билан учрашган эди. Учрашувда АҚШ томони янги Ўзбекистонда олиб борилаётган демократик ўзгаришлар ва ижтимоий-иқтисодий ислоҳотлар дастурини қўллаб-қувватланишини маълум қилганди.
Изоҳ (0)