Ижтимоий тармоқларда Тошкент вилояти Ўрта Чирчиқ туманида Халқ банкига тегишли Damas автомобили ва «Жигули» билан тўқнашиб кетгани акс этган видео тарқалди. Йўл ҳаракати хавфсизлиги хизмати ҳолат бўйича маълумот берди.
Қайд этилишича, йўл-транспорт ҳодисаси 2021 йилнинг 13 октябрь куни соат 10:30 ларда Ўрта Чирчиқ тумани ҳудудидан ўтган Avangard—Ўртасарой автомобиль йўлининг 5-километрида содир бўлган. Ҳайдовчи Б.Т. бошқарувида бўлган Damas ҳамда ҳайдовчи У.А. бошқарувида бўлган «Ваз-2106» автомобиллари иштирокида тўқнашув содир бўлган.
ЙТҲ оқибатида йўловчи З.Э. енгил тан жароҳати олиб шифохонага мурожаат қилган.
Ҳолат юзасидан томонидан тўпланган ҳужжатлар 2021 йил 27 октябрь куни жиноят ишлари бўйича Ўрта Чирчиқ тумани суди томонидан кўриб чиқилган. Damas ҳайдовчиси Б.Т. Маъмурий жавобгарлик тўғрисидаги кодекснинг 133-моддаси (транспорт воситалари ҳайдовчиларининг йўл ҳаракати қоидаларини бузиши жабрланувчига енгил тан жароҳати ёки анча миқдорда моддий зарар етказилишига олиб келиши)да назарда тутилган ҳуқуқбузарликни содир этган деб топилган. Унга нисбатан БҲМнинг уч баравари миқдорида жарима жазоси белгиланган.
Шунингдек, ҳуқуқбузар Б.Т.дан Халқ банки Ўрта Чирчиқ филиали фойдасига 19 миллион 186 минг 42 сўм ундирилиши белгиланган. Халқ банки Ўрта Чирчиқ филиалидан жабрланувчи А.А.нинг фойдасига эса 7 миллион 773 минг 294 сўм зарар ундирилади.
Аввалроқ Наманганда 14 ёшли бола «Жигули»да тенгдошини босиб кетиб, унинг ўлимига сабабчи бўлгани, Сирдарёда Lacetti ва Nexia тўқнашуви оқибатида 5 киши вафот этгани, Тошкент вилоятида «Жигули» ва Cobalt тўқнашувида икки киши ҳалок бўлгани, улардан бири 1 ёшга ҳам тўлмагани ҳақида хабар берилган.
Изоҳ (0)