Наманганда 2021 йил давомида сувга чўкиш билан боғлиқ 24 та бахтсиз ҳодиса содир бўлди. Бу ҳақда вилоят Фавқулодда вазиятлар бошқармаси бошлиғининг ўринбосари, подполковник Дилмурод Абдураҳмонов маълум қилди, дея хабар беради «Дарё» мухбири Азизбек Абдувалиев.
ФВБ мутасаддисининг айтишича, ушбу ҳодисаларнинг аксарияти, аниқроғи, 21 таси вояга етмаганлар билан боғлиқ.
«Мавсум олдидан Намангандаги дарё, канал ва сойлар ҳамда шаҳар-туманларда жойлашган 8 та сув омбори қирғоқларига ходимларимиз томонидан 1000 га яқин чўмилиш та’қиқланганини англатувчи белгилар ўрнатилди. Афсуски, болаларимиз кўпинча айнан мана шундай белгилар остидаги жойларда чўмилаётганига гувоҳ бўламиз. Чўмилаётган болаларнинг кўпи асли сузишни билмайди, бунга ўргатилмаган. Яна бир муаммо — катталарнинг бепарволиги ва лоқайдлиги. Она ёш болаларини қаровсиз қолдириб, маърака-маросимга кетяпти, ота вояга етмаган боласини сув ёқасидаги дўконга юборяпти. Чўкаётган шахсни махсус тайёргарликдан ўтган ходимлар келиб қутқариб олиш эҳтимоли эса жуда кам, чунки бу жараён маълум бир вақтни талаб қилади», — дейди Дилмурод Абдураҳмонов.
Маълумот учун, жорий йил 5 ойи давомида Наманганда 8 киши сувга чўкиб кетди. Улардан 6 нафари вояга етмаганлар.
Изоҳ (0)