Erdo‘g‘on Turkiya chegaralarida aksilterrorchilik operatsiyalari o‘tkazilishini e’lon qildi

Turkiya Qurolli kuchlari mamlakat janubiy chegaralari yaqinida aksilterrorchilik operatsiyalarini boshlaydi, bu haqdagi qaror yaqin orada qabul qilinadi, deb yozadi “RBK”. Bu haqda Turkiya prezidenti Rajab Toyyib Erdo‘g‘on vazirlar mahkamasi yig‘ilishidan keyin ma’lum qildi.

“Biz hujumlar amalga oshirilayotgan bir paytda chegaralarimizda xavfsizlikni ta’minlash bo‘yicha o‘z vazifalarimizni davom ettiramiz. Tez orada chegaralarimizda yangi operatsiyalar boshlanadi, Xavfsizlik kengashi majlisida tegishli qarorlar qabul qilinadi”, — dedi u. Prezidentning so‘zlariga ko‘ra, bu 26-may, payshanba kuni bo‘lib o‘tadi.

Erdo‘g‘on aniqlik kiritishicha, mamlakat qurolli kuchlari, shuningdek, razvedka va xavfsizlik kuchlari tayyor bo‘lishi bilan operatsiya boshlanadi.

Operatsiya, Erdo‘g‘onning so‘zlariga ko‘ra, Turkiya janubiy chegaralaridan (bu tomondan mamlakat Suriya va Iroq bilan chegaradosh) 30 km uzoqlikda o‘tkaziladi. Kurdiston ishchilar partiyasi shtablari ushbu hududga qarata yo‘naltirilgan bo‘lib, uni Anqara terrorchilik tashkiloti deb hisoblaydi.

Kurdiston ishchilar partiyasi 1978-yilda tuzilgan. Ular Turkiyadagi kurdlarning millat sifatida o‘z taqdirini o‘zi belgilashi tarafdori bo‘lib, bu millat jips yashaydigan Suriya va Iroqda ham ish olib boradi.

Turkiya Kurdiston ishchilar partiyasiga qarshi muntazam aksilterrorchilik operatsiyalarini o‘tkazib boradi. Ularning so‘nggisi iroqlik kurdlarga qarshi qaratilgandi. Jangovar harakatlar aprel o‘rtalarida boshlangan bo‘lib, Turkiya armiyasi Iroqning Metin, Zap va Avasin-Basyan shimoliy tumanlarini o‘qqa tutgan. Turkiya maxsus kuchlari ishtirokidagi yana bir harbiy operatsiya o‘tgan yil aprelida Iroq shimolida o‘tkazilgandi.

Turkiya Shvetsiya va Finlyandiyaning NATOga qo‘shilishini ma’qullamaydi va ular Kurdiston ishchilar partiyasi a’zolarini unga topshirishiga erishmoqchi. Ikkala mamlakat hukumati ham Turkiya bilan kelishib olishga tayyorligini ma’lum qildi. Xususan, Shvetsiya bosh vaziri Magdalena Andersson Kurdiston ishchilar partiyasini terrorchilik tashkilotlari ro‘yxatiga kiritish g‘oyasini ma’qullashini aytdi, Finlyandiya tashqi ishlar vaziri Pekka Xaavisto esa mamlakat ichida partiya bilan aloqalarni puxtaroq kuzatishga va’da berdi. Ammo Finlyandiya hukumati partiya a’zolari yoki unga bog‘liq odamlar sud qarshisiga chiqmagunicha, ularni Turkiyaga ekstraditsiya qila olmasligini ta’kidladi.