Эрдўғон Туркия чегараларида аксилтеррорчилик операциялари ўтказилишини эълон қилди

Туркия Қуролли кучлари мамлакат жанубий чегаралари яқинида аксилтеррорчилик операцияларини бошлайди, бу ҳақдаги қарор яқин орада қабул қилинади, деб ёзади «РБК». Бу ҳақда Туркия президенти Ражаб Тоййиб Эрдўғон вазирлар маҳкамаси йиғилишидан кейин маълум қилди.

«Биз ҳужумлар амалга оширилаётган бир пайтда чегараларимизда хавфсизликни таъминлаш бўйича ўз вазифаларимизни давом эттирамиз. Тез орада чегараларимизда янги операциялар бошланади, Хавфсизлик кенгаши мажлисида тегишли қарорлар қабул қилинади», — деди у. Президентнинг сўзларига кўра, бу 26 май, пайшанба куни бўлиб ўтади.

Эрдўғон аниқлик киритишича, мамлакат қуролли кучлари, шунингдек, разведка ва хавфсизлик кучлари тайёр бўлиши билан операция бошланади.

Операция, Эрдўғоннинг сўзларига кўра, Туркия жанубий чегараларидан (бу томондан мамлакат Сурия ва Ироқ билан чегарадош) 30 км узоқликда ўтказилади. Курдистон ишчилар партияси штаблари ушбу ҳудудга қарата йўналтирилган бўлиб, уни Анқара террорчилик ташкилоти деб ҳисоблайди.

Курдистон ишчилар партияси 1978 йилда тузилган. Улар Туркиядаги курдларнинг миллат сифатида ўз тақдирини ўзи белгилаши тарафдори бўлиб, бу миллат жипс яшайдиган Сурия ва Ироқда ҳам иш олиб боради.

Туркия Курдистон ишчилар партиясига қарши мунтазам аксилтеррорчилик операцияларини ўтказиб боради. Уларнинг сўнггиси ироқлик курдларга қарши қаратилганди. Жанговар ҳаракатлар апрель ўрталарида бошланган бўлиб, Туркия армияси Ироқнинг Метин, Зап ва Авасин-Басян шимолий туманларини ўққа тутган. Туркия махсус кучлари иштирокидаги яна бир ҳарбий операция ўтган йил апрелида Ироқ шимолида ўтказилганди.

Туркия Швеция ва Финляндиянинг НАТОга қўшилишини маъқулламайди ва улар Курдистон ишчилар партияси аъзоларини унга топширишига эришмоқчи. Иккала мамлакат ҳукумати ҳам Туркия билан келишиб олишга тайёрлигини маълум қилди. Хусусан, Швеция бош вазири Магдалена Андерссон Курдистон ишчилар партиясини террорчилик ташкилотлари рўйхатига киритиш ғоясини маъқуллашини айтди, Финляндия ташқи ишлар вазири Пекка Хаависто эса мамлакат ичида партия билан алоқаларни пухтароқ кузатишга ваъда берди. Аммо Финляндия ҳукумати партия аъзолари ёки унга боғлиқ одамлар суд қаршисига чиқмагунича, уларни Туркияга экстрадиция қила олмаслигини таъкидлади.