Avvalgi hukumat davri tadbirkorlar erkin faoliyat yuritishi uchun murakkab bo‘lgan. Bu haqda 14-may kuni Toshkent shahrida bo‘lib o‘tgan biznes uchrashuvda “Chust tekstil” korxonasi asoschisi Jamshid Ismatullayev aytib o‘tdi, deya xabar bermoqda “Daryo” muxbiri.
Jamshid Ismatullayev Savdo-sanoat palatasi, Moliya vazirligi, Soliq qo‘mitasi vakillari hamda tadbirkorlar ishtirokidagi tadbirdan so‘ng “Daryo” nashriga intervyu berdi. Uning aytishicha, avvalgi hukumat davrida tadbirkorlar ishlashi uchun ancha qiyin bo‘lgan.
“So‘nggi 5 yilda tadbirkorlarga boshqacha e’tibor berilmoqda, ijobiy o‘zgarishlar bo‘lmoqda. O‘zimning misolimda aytishim mumkinki, avvallari ozgina xato uchun soliq, prokuratura va boshqa davlat organlari, kerak bo‘lsa, xalq dushmaniga aylantirishga ham tayyor turishardi. Chunki ularning ko‘pchiligi tadbirkor bo‘lmagani uchun bu sohaning mashaqqatli ekanini, oldingi ziddiyatlarda ishlash qanchalik qiyin bo‘lganini bilishmasdi. Ilgari ishlagan odam xohlasa-xohlamasa, qonunni buzardi. Chunki qonunlar bir-biriga zid edi. Bitta qonundan sakrab o‘tsangiz, ikkinchisiga tushib qolardingiz. Qonun ishlab chiqishda dunyo talablari hisobga olinmasdi. Kabinetlarda o‘tirib, qonunlar qabul qilingan”, — dedi tadbirkor.
Jamshid Ismatullayevning ta’kidlashicha, bugun ham ijobiy o‘zgarishlar bilan birga tizimlarda ayrim eskicha tartiblar mavjud.
“Ha, 5 yil davomida ko‘p o‘zgarishlar bo‘ldi. Lekin eskicha qarashlar, tartiblar hali ham bor. Masalan, import masalasida. Yashil va qizil yo‘lakchalar haqida alohida to‘xtalish kerak. Chunki bu masalada juda ko‘p savollar bor. Misol uchun, oldi-sotdi, ishlab chiqarish va boshqalarga belgilangan qoidalar umumiy. Ularga alohida koeffitsiyentlar belgilanishi kerak. Bugungi kundagi muammolarimizdan biri, to‘qimachilik sohasida ishlayotgan bo‘lsak, biz bilan hamkorlik qilayotganlar qizil yo‘lakda. Ya’ni ular bilan ishlash bizga taqiqlanadi. Ammo kim bilan ishlashimiz kerak? Hammasi qizil bo‘lsa, bizning tanlash huquqimiz yo‘q-ku! Ular nega qizil deb so‘rasangiz, paxta yetishtirish jarayoni juda uzoq muddat talab qiladi. Talabni belgilangan chegaralar ichida bajarib bo‘lmaydi. Ya’ni bunda toifalarga ajratish kerak. Hozir o‘zimdan oldingilarga ham javob berishimizga to‘g‘ri kelyapti. Men qanday qilib boshqa ishlab chiqaruvchi ishlariga aralashishim, uni to‘g‘ri ishlashga yo‘naltirishim mumkin? Men boshqalar uchun javob bermasligim kerak”, — dedi “Chust tekstil” korxonasi asoschisi.
Izoh (0)