«Олдинлари хато қилсак, халқ душманига айлантиришга тайёр туришарди» — тадбиркор Ўзбекистон ҳукуматининг аввалги ва бугунги сиёсати ҳақида

Аввалги ҳукумат даври тадбиркорлар эркин фаолият юритиши учун мураккаб бўлган. Бу ҳақда 14 май куни Тошкент шаҳрида бўлиб ўтган бизнес учрашувда «Чуст текстил» корхонаси асосчиси Жамшид Исматуллаев айтиб ўтди, дея хабар бермоқда «Дарё» мухбири.

Жамшид Исматуллаев Савдо-саноат палатаси, Молия вазирлиги, Солиқ қўмитаси вакиллари ҳамда тадбиркорлар иштирокидаги тадбирдан сўнг «Дарё» нашрига интервью берди. Унинг айтишича, аввалги ҳукумат даврида тадбиркорлар ишлаши учун анча қийин бўлган.

«Сўнгги 5 йилда тадбиркорларга бошқача эътибор берилмоқда, ижобий ўзгаришлар бўлмоқда. Ўзимнинг мисолимда айтишим мумкинки, авваллари озгина хато учун солиқ, прокуратура ва бошқа давлат органлари, керак бўлса, халқ душманига айлантиришга ҳам тайёр туришарди. Чунки уларнинг кўпчилиги тадбиркор бўлмагани учун бу соҳанинг машаққатли эканини, олдинги зиддиятларда ишлаш қанчалик қийин бўлганини билишмасди. Илгари ишлаган одам хоҳласа-хоҳламаса, қонунни бузарди. Чунки қонунлар бир-бирига зид эди. Битта қонундан сакраб ўтсангиз, иккинчисига тушиб қолардингиз. Қонун ишлаб чиқишда дунё талаблари ҳисобга олинмасди. Кабинетларда ўтириб, қонунлар қабул қилинган», — деди тадбиркор.

Жамшид Исматуллаевнинг таъкидлашича, бугун ҳам ижобий ўзгаришлар билан бирга тизимларда айрим эскича тартиблар мавжуд.

«Ҳа, 5 йил давомида кўп ўзгаришлар бўлди. Лекин эскича қарашлар, тартиблар ҳали ҳам бор. Масалан, импорт масаласида. Яшил ва қизил йўлакчалар ҳақида алоҳида тўхталиш керак. Чунки бу масалада жуда кўп саволлар бор. Мисол учун, олди-сотди, ишлаб чиқариш ва бошқаларга белгиланган қоидалар умумий. Уларга алоҳида коэффициентлар белгиланиши керак. Бугунги кундаги муаммоларимиздан бири, тўқимачилик соҳасида ишлаётган бўлсак, биз билан ҳамкорлик қилаётганлар қизил йўлакда. Яъни улар билан ишлаш бизга тақиқланади. Аммо ким билан ишлашимиз керак? Ҳаммаси қизил бўлса, бизнинг танлаш ҳуқуқимиз йўқ-ку! Улар нега қизил деб сўрасангиз, пахта етиштириш жараёни жуда узоқ муддат талаб қилади. Талабни белгиланган чегаралар ичида бажариб бўлмайди. Яъни бунда тоифаларга ажратиш керак. Ҳозир ўзимдан олдингиларга ҳам жавоб беришимизга тўғри келяпти. Мен қандай қилиб бошқа ишлаб чиқарувчи ишларига аралашишим, уни тўғри ишлашга йўналтиришим мумкин? Мен бошқалар учун жавоб бермаслигим керак», — деди «Чуст текстил» корхонаси асосчиси.