Ukraina qurolli kuchlari bosh shtabi 17-mayga o‘tar kechasi Mariupoldagi “Azovstal” zavodidan harbiylarni “qutqarish operatsiyasi” o‘tkazilganini ma’lum qildi, deb yozadi Meduza. 53 kishi og‘ir jarohatlar bilan Novoazovsk kasalxonasiga yetkazilgan, yana 211 harbiy xizmatchi esa Yelenovkaga olib ketilgan (ikkala aholi punkti ham Donetsk xalq respublikasi tomonidan nazorat qilinadi), u yerdan “ayirboshlash jarayoni orqali” ular Ukrainaga yuboriladi.
Rossiya hukumati vakillari hozircha bo‘lg‘usi ayirboshlashuv haqidagi ma’lumotni izohlagani yo‘q.
“‘Mariupol’ garnizoni berilgan harbiy topshiriqni bajardi. Oliy harbiy qo‘mondonlik tomonidan Azovstaldagi bo‘linmalar komandirlariga shaxsiy tarkib hayotini saqlab qolish buyrug‘i berilgandi… ‘Azovstal’ hududida qolayotgan himoyachilarni qutqarish bo‘yicha chora-tadbirlar davom etmoqda”, — deyiladi Bosh shtab bayonotida.
Ukraina prezidenti Vladimir Zelenskiy kechki murojaatida “ukrain qahramonlari Ukrainaga sog‘-omon holda kerak”ligini va ularni qaytarish ishlari “ehtiyotkorlik va vaqt talab qilishi”ni ta’kidladi.
Avvalroq Reuters agentligi 16-may, dushanba kuni “Azovstal”dan o‘nga yaqin avtobus chiqib ketganini, ularda ukrainalik harbiylar bo‘lishi mumkinligini ma’lum qilgandi. Avtobuslar ichida o‘tirgan odamlar sonini baholash imkoniyati bo‘lmagan. RT zavoddan “taxminan 300 jangchi”, shu jumladan 50 ga yaqin yaradorlar chiqib ketganini xabar qilgan.
Birinchi kanal xabariga ko‘ra, tonggi to‘rtda “Azovstal”dan keltirilgan ukrainalik harbiylar asirlikka olinishda davom etgan, Yelenovkaga yetkazilganlar esa ertalab so‘roq qilinishi aytilgan. Telekanal ma’lumotlari bo‘yicha zavodda 2,2 mingdan ortiq odam qolmoqda.
16-may kuni Rossiya Mudofaa vazirligi “Azovstal”da qamalda qolgan harbiy xizmatchilar bilan yaradorlarni chiqarib ketish haqida kelishilganini ma’lum qilgandi. Ukraina hukumati bu bayonotni izohlamadi; zavodni yarador bo‘lmagan harbiy xizmatchilar ham tark etishi haqida xabar berilmadi. Keyinroq Rossiya OAVlari va ularning harbiy muxbirlari Telegram-kanallarida “Azovstal”dan evakuatsiya qilinayotgani aytilayotgan yarador askarlar aks etgan videolar paydo bo‘la boshladi. Kechqurun Reuters agentligi Novoazovskka yetkazilgan yaradorlar suratlarini e’lon qildi.
Kechga yaqin “Azov” polki “Mariupol himoyachilari buyruqni bajargani”, butun urush mobaynida “dushmanning ustun kuchlari”ni o‘ziga olgan holda va Ukraina armiyasiga qayta guruhlanish, sheriklardan qurol-yarog‘ qabul qilish va shaxsiy tarkibni ko‘proq tayyorlash imkonini bergani haqida bayonot e’lon qildi. Endi esa, deyiladi bayonotda, “odamlar hayotini saqlab qolish maqsadida butun Mariupol garnizoni oliy harbiy qo‘mondonlikning tasdiqlangan qarorini bajaradi va ukrain xalqi tomonidan qo‘llab-quvvatlanishga umid qiladi”. Gap qanday qaror haqida borayotganiga aniqlik kiritilmagan.
Avvalroq “Azov” jangchilari mudofaani ushlab turish haqidagi buyruqni bajarayotgani, shu sababli taslim bo‘la olmasligini aytgandi.
Avvalroq “Azov” jangchilari “Azovstal”dan evakuatsiya qilinishni o‘zlarining yagona imkoniyati deb atagan edi. 8-may kuni jurnalistlarga asirga tusha olmasliklari haqida gapirar ekan, “Azov” razvedka boshqarmasi ofitseri Ilya Samoylenko bir harbiy xizmatchi voqeasini misol qilib keltirgandi: u ukrainaliklar taslim bo‘layotgani haqidagi propagandachilar videosida tirik deb ko‘rsatilgan, “keyin esa onasi uning o‘limi haqida xabar olgan”.
“Azovstal”dagi odamlarning ozod etilishi so‘nggi bir necha haftalardan buyon davom etayotgan asosiy mavzulardan biridir. 11-may kuni “Azov” polki jangchilarining rafiqalari Rim papasi Fransisk bilan uchrashib, undan Rossiya prezidenti bilan ularni ozod etish haqida gaplashishni so‘ragan edi. 14-may kuni “Azovstal”ga yordam berish da’vati bilan “Yevrovideniye” g‘olibi Kalush Orchestra guruhi sahnada chiqish qildi. Vladimir Zelenskiy Mariupoldagi ukrainalik harbiylarning o‘ldirilishi Rossiya bilan tinchlik muzokaralariga “nuqta qo‘yishi”ni aytgandi.
Izoh (0)