14-may kuni Amerikaning Nyu-York shtati Buffalo shahridagi supermarketda otishma yuz berdi: o‘n kishi halok bo‘ldi, yana uch kishi yaralandi. O‘qotar nishonga olgan odamlarning deyarli barchasi, 11 kishi, qora tanlilar edi. Politsiya hodisani nafrat asosidagi jinoyat sifatida tekshirmoqda, deb yozadi Meduza.
The New York Times xabariga ko‘ra, ish bo‘yicha Nyu-York shtatining Konklin shaharchasida yashovchi kollej talabasi, 18 yoshli Peytron Gendron qo‘lga olingan. Politsiya ma’lumotlari bo‘yicha, u hujumni amalga oshirish uchun 300 kilometrdan ortiq masofani bosib o‘tgan. O‘qotar internetda e’lon qilgan 180 sahifali manifest (murojaat)da aytilishicha, u ushbu tumanni tanlashiga sabab shuki, u yerda o‘zi yashaydigan shtatdagi “qora tanlilarning eng katta foizi” istiqomat qiladi.
Shuningdek, uning yozishicha, Buffalodagi hujumga u bir necha yil davomida tayyorlangan, o‘q-dorilar sotib olgan va merganlikni mashq qilgan. Associated Press ma’lumotlariga ko‘ra, manifest “Buyuk siqib chiqarish nazariyasi” deb nomlangan bo‘lib, uning asosiy mazmuni — “AQShdagi oq tanli odamlar ozchiliklar tomonidan siqib chiqarilayotgani”dan iborat.
AP ma’lumotlariga qaraganda, qotil voqeani Twitch platformasida o‘z shlemiga o‘rnatilgan kamera orqali to‘g‘ridan to‘g‘ri translyatsiya qilgan. Mahalliy vaqt bilan 14:30 atrofida o‘qotar supermarketga yetib kelgan — u harbiy forma, zirhli nimcha kiyib, yonida shturm quroli bo‘lgan.
Avtomobillar turargohida to‘rt kishini otib tashlab, so‘ng do‘konga kirgan va u yerda qo‘riqchiga duch kelgan. Unga javob o‘ti ochilgan, ammo hujumchini zirhli nimchasi asrab qolgan. U qo‘riqchini otib tashlab, sotuvchilar va xaridorlarni o‘qqa tutishda davom etgan. Omon qolgan do‘kon menejeri Buffalo News’ga ma’lum qilishicha, qariyb 70 marta o‘q uzilganini eshitgan.
O‘qotarni qo‘lga olishga urinishganida, u o‘z joniga qasd qilmoqchi bo‘lgan: erkak bo‘yniga to‘pponcha tiragan, biroq politsiyachilar uni qurolni tashlab, taslim bo‘lishga ko‘ndira olgan.
Hozircha Gendronga qotillik ayblovi qo‘yilgan, ushbu modda bo‘yicha maksimal jazo — muddatidan oldin ozod etilish huquqisiz umrbod qamoq jazosi (Nyu-York shtatida o‘lim jazosi yo‘q). Shuningdek, sud unga sud-tibbiy ekspertizani tayinlagan.
AQSh prezidenti Jo Bayden o‘z bayonotida qurbonlar va ularning oilalari uchun duoda ekanini aytib, huquq-tartibot organlari va hujumchini qo‘lga olishda ishtirok etgan boshqa xizmatlar xodimlariga ko‘rsatgan jasoratlari uchun minnatdorlik bildirdi.
“Har qanday ichki terrorchilik harakati, shu jumladan, jirkanch oq milliy mafkuraga asoslangan harakat ham biz Amerikada yoqlab chiqayotgan narsalarning barchasiga ziddir. Nafratning xavfsiz bandargohi bo‘lmasligi kerak. Biz nafrat asosidagi ichki terrorchilikka nuqta qo‘yish uchun qo‘limizdan kelganini qilishimiz kerak”, — dedi Bayden.
Nyu-York shtati gubernatori Keti Xokul qotil hujumni to‘g‘ridan to‘g‘ri efirda uzata olgani yuzasidan o‘z xavotirini bildirdi. “U buni platformada e’lon qila olgani tamoman hayratga soladi. Media kontentni nazorat qilishda yanada hushyor bo‘lishi kerak”, — dedi u.
Twitch qayd etishicha, hujumchining to‘g‘ridan to‘g‘ri translyatsiyasi u boshlanganidan keyin ikki daqiqa ichida o‘chirib tashlangan. Ammo translyatsiya skrinshotlari ijtimoiy tarmoqlarda tarqalishga ulgurgan, deb yozadi Reuters.
15-may kuni AQShning Kaliforniya shtati Laguna-Vuds shahridagi presviterian cherkovida ham otishma sodir etildi, oqibatda bir kishi halok bo‘lib, to‘rt kishi jabrlandi. Hodisa Toshkent vaqti bilan 16-may 1:26 da yuz bergan. Hujumchi voqea joyida qo‘lga olingan. Boshqa tafsilotlar keltirilmagan.
Izoh (0)