Реконструкция ишлари учун ажратилган маҳсулотларни талон-торож қилган «Бекободйўлиндустрия» УК мансабдор шахсларига нисбатан жиноят иши қўзғатилди. Бу ҳақда Давлат хавфсизлик хизмати хабар қилди.
Қайд этилишича, ДХХ томонидан олиб борилган тезкор-қидирув тадбирлари натижасида ноқонуний ҳолат аниқланган. Унга кўра, 2017 йилда Автомобиль йўллари қўмитаси таркибидаги «Ўзйўлбутлаш» Республика таъминот бошқармаси унитар корхонаси томонидан пудратчи «Бекободйўлиндустрия» унитар корхонасига М-39 Тошкент—Термиз автомобиль йўлининг Қашқадарё вилояти ҳудудидан ўтувчи 1265-1297 километрини қисмини реконструкция қилиш учун 1103,2 тонна йўлбоп импорт битум маҳсулоти етказиб берилган.
Ажратилган битум маҳсулоти қайд этилган объектга сарфланиши кўрсатилган. Шунга қарамай, «Бекободйўлиндустрия» унитар корхонасининг мансабдор шахслари қурилиш ишларини якунига етказмасдан, 738,2 тонна битумни бошқа корхоналарга 933 миллион сўмга сотиб юборган. Ундан тушган пул маблағларини мақсадсиз сарфлаб юборган.
Ҳолат юзасидан Транспорт прокуратураси томонидан «Бекободйўлиндустрия» УК мансабдор шахслари ва бошқаларга нисбатан Жиноят кодексининг 205-моддаси (ҳокимият ёки мансаб ваколатини суиистеъмол қилиш) 2-қисми «а» банди билан жиноят иши қўзғатилган. Ҳозирда тергов ҳаракатлари олиб борилмоқда.
Изоҳ (0)