Oliy Majlis deputati Fan, ta’lim, madaniyat va sport masalalari qo‘mitasi a’zosi, yoshlar masalalari bo‘yicha komissiya a’zosi Shahnoza Xolmahamatova surxondaryolik zo‘ravon o‘qituvchi borasida fikr bildirib, “Mushtumzo‘r o‘qituvchilar bilan uzoqqa bora olmaymiz”, demoqda.

O‘qituvchi bokschilardek ayamasdan o‘z o‘quvchisini do‘pposlagan. Axir jazolashning tajribada sinalgan, ilmiy isbotlangan ko‘plab usullari bor-ku. Bu haqda gapiraverib charchadik. Mazkur vaziyatda faqatgina o‘qituvchini ayblashdan yiroqman. Bu holat oldin ham takrorlanmaganiga hech kim kafolat berolmaydi. Zo‘ravon o‘qituvchi qatorida maktab ma’muriyatini ham birdek aybdor hisoblayman. Negaki o‘qituvchining bu kabi qiliqlariga o‘z vaqtida chora ko‘rganida bugungidek xunuk holat kuzatilmasdi. Yomon illat bir soatda yoki bir kunda shakllanib qolmaydi.

Pedagog degan ulug‘ nomga dog‘ tushirayotgan bu kabi mushtumzo‘r o‘qituvchilarni o‘qituvchilik qilish imkoniyatidan va sharafidan mahrum qilish tarafdoriman. Bolani urib-tepib tahqirlayotgan bu akamizning ruhiy holatini ham obdon tekshirish va bu holatni chuqurroq o‘rganib, huquqiy baho berish lozim deb hisoblayman.

Agar o‘qituvchi mahoratli va bilimli bo‘lsa, o‘quvchilarni urmasdan, tepmasdan, qo‘rqitmasdan ham o‘z faniga qiziqtira oladi. Biz ham o‘quvchi bo‘lganmiz. Buni yaxshi bilamiz. Bugungi shiddatli davrda farzandlarimizni vahshiyliklardan, zo‘ravonliklardan himoya qilib, ishonchini qozonib, ularni to‘g‘ri yo‘naltirib, mehr va muhabbat ko‘rsatishda o‘rnak bo‘lolmasak, ularni ham, kelajakni ham yo‘qotamiz. Farzandlarimizni mantiqiy fikrlashga, o‘z fikrlarini erkin ifodalashga o‘rgatish muhim bo‘lgan bir davrda kaltaklardan taniga ham, ruhiyatiga ham jarohat berib o‘zini ustoz deb yurgan ba’zi o‘qituvchilarimizga yuqoridagi holatdan xulosa qilishlarini so‘raymiz.

Shahnoza Xolmahamatova

Avvalroq Surxondaryo viloyatining Bandixon tumanidagi 4-sonli umumta’lim maktabida o‘qituvchi o‘quvchini ayovsiz kaltaklayotgani ko‘ringan video tarqaldi. “Daryo” so‘roviga javoban mazkur holatni izohlagan Surxondaryo viloyat xalq ta’limi boshqarmasi axborot xizmati zo‘ravon o‘qituvchi va maktab direktori tuman IIBga olib ketilganini ma’lum qildi. So‘ngra holatga Bosh prokuratura e’tibor qaratib, holat o‘rganilayotganini, holatga huquqiy baho berilishini, vaziyat viloyat prokuraturasi nazoratida ekanini bildirdi.

Keyinroq esa zo‘ravon ingliz tili o‘qituvchisi bilan birgalikda maktab direktorining ma’naviy-ma’rifiy ishlar bo‘yicha o‘rinbosari ham ishdan olingani xabar berildi. Xalq ta’limi vazirligi esa o‘qituvchining o‘quvchilarni kaltaklashini keskin qoralab munosabat bildirdi.

“Daryo”ga o‘rganish xulosalari haqida ma’lumot bergan viloyat xalq ta’limi boshqarmasi kaltaklangan o‘quvchi voqeasi ortidan direktorning o‘quv ishlari bo‘yicha o‘rinbosari, shuningdek o‘quvchining sinf rahbari ham ishdan olinganini, maktab direktori  bo‘shash haqida ariza yozganini ma’lum qildi.