Буюк Британия разведкаси: Россия февраль ойида Украина чегарасидаги ҳарбий кучларининг учдан бир қисмини йўқотган
Россия армияси уруш бошланганидан бери Украина чегарасига жойлаштирган қуруқликдаги ҳарбий кучларининг учдан бир қисмини йўқотган. Бу ҳақда Буюк Британия мудофаа вазирлиги разведка маълумотларига таяниб хабар берган.
«Россиянинг Донбассга ҳужум суръатлари тушиб кетган ва белгиланган жадвалдан кечга қолмоқда. Урушнинг дастлабки кунларида эришилган кичик муваффақиятларга қарамай сўнгги ойда Россия олдинга томон силжий олмади, катта йўқотишларга учради. Айни вақтда Россия февраль ойида чегараларга жойлаштирган қуруқликдаги ҳарбий кучларининг учдан бир қисмини йўқотган», — дейилади вазирликнинг Twitter’даги баёнотида.
Вазирлик хабарида Украинадаги ҳарбий ҳаракатлар давомида Россиянинг қанча аскари ҳалок бўлгани ёки яралангани борасида аниқ рақамлар келтириб ўтилмаган.
Буюк Британия мудофаа вазирлиги яқин ойлар давомида Россия томонидан Украинадаги ҳарбий ҳаракатларни янада жадаллаштириш борасида чоралар кўрилишининг эҳтимоли камлигини тахмин қилган.
Фаврал ойида Буюк Британия разведакасининг Украинадаги урушга жалб қилинган Россия қўшинлари сонини қандай аниқлагани ҳанузгача номаълум. Январда АҚШ ва унинг иттифоқчилари Россиянинг Украина билан чегаралардаги қўшини 100 минг эканини билдирган, 13 февралда уларнинг сони 130 минг нафарга етгани, 20 февралда эса ДХР ва ЛХР ҳарбийлари, жангчилари билан қўшиб ҳисоблаганда 169 – 190 минг нафар аскар Украинада жанг қилаётгани ҳақида хабарлар тарқалганди.
Украинада уруш бошланганидан бери Россия мудофаа вазирлиги икки марта ўз армиясидаги йўқотишлар ҳақида расмий маълумот берган. 2 март куни 498 нафар аскар ҳалок бўлгани, 1597 нафар ҳарбий яралангани, 25 март куни эса 1351 киши ўлгани, 3825 нафар ҳарбий хизматчининг яралангани хабар қилинган.
Украина қуролли кучлари бош штаби 15 май ҳолатига кўра Россиянинг ҳарбий йўқотишлари 27,4 минг нафар эканлигини билдирган.Аввал Британия Мудофаа вазирлиги Россия қўшинларининг Украинадаги урушда кўрган йўқотишларини тиклаш учун йиллар керак бўлиши ҳақида баёнот берганди.
