2022 йилнинг апрель ойида ҳам сўмнинг реал самарали алмашув курси март ойига нисбатан қарийб 1,4 фоизга қадрсизланди. Бу ҳақда Марказий банк шарҳидан маълум бўлди.
Апрель ойида реал самарали алмашув курсининг қадрсизланишига асосан савдо-ҳамкор давлатлардаги юқори инфляция даражаси ҳамда валюта курсларидаги турли йўналишдаги ўзгаришлар билан изоҳланади, — дейди Марказий банк
Апрель ойидаги реал самарали алмашув курси индекси динамикасида:
- оширувчи омиллар: ички инфляция – 1,5 фоиз банд;
- пасайтирувчи омил: савдо-ҳамкор давлатлар инфляцияси – 1,7 фоиз бандни, савдо-ҳамкор давлатлар валюта курслари ўзгариши – 0,2 фоиз банд ҳамда сўм алмашув курси – 0,9 фоиз бандни ташкил этди.
2022 йил биринчи чорагида Россия савдо баланси 66,3 млрд АҚШ доллар профицит билан ижро этилди. Шунингдек, 29 апрель куни Россия Марказий банки асосий фоиз ставкасини 17 фоиздан 14 фоизгача пасайтирди.
Қозоғистон тенгеси ҳам апрель ойида 3,8 фоизга (470,9 дан 452,9 га) мустаҳкамланди. Қозоғистон Марказий банки 25 апрелда асосий фоиз ставкасини 13,5 фоиздан 14 фоизгача оширди.
Турк лираси эса мазкур ой давомида бироз (0,2 фоизга) қадрсизланди.
Апрель ойида Хитойда кузатилган пандемиянинг янги тўлқини фонида юань 1,2 фоизга қадрсизланди.
2022 йил апрель ойида асосий савдо-ҳамкор давлатларнинг деярли барчасида инфляция кўрсаткичи ўсишда давом этди, — дейилади Марказий банк шарҳида.Россияда ойлик инфляция март ойига нисбатан бироз секинлашиб, 1,6 фоизни (йиллик ҳисобда 18 фоизни) ташкил этиши кутилмоқда.
Шунингдек, импорт қилинадиган автомобиллар, маиший кимё воситалари ҳамда дори-дармонлар нархи ўсиши секинлашган.
Қозоғистонда ойлик инфляция 2 фоизни ташкил этиб, йиллик ҳисобда 13,2 фоизга етди. Бунда озиқ-овқат маҳсулотлари ойлик 3,1 фоизга (йиллик 17,9 фоизга) ўсди.
Туркияда ойлик инфляция 7,3 фоизга юқорилаб, йиллик ҳисобда 70 фоизгача ўсди. Нархлар ўсишига асосан озиқ-овқат ҳамда ёқилғи маҳсулотлари катта ҳисса қўшган. Мамлакатда ишлаб чиқарувчилар нархлари индекси ойлик ҳисобда 7,7 фоизга ўсиб, йиллик 121,8 фоизга етди.
Изоҳ (0)