Xorazm viloyatining Urganch shahrida soxta aviachiptalarni sotish bilan shug‘ullangan shaxslarga nisbatan jinoyat ishi qo‘zg‘atildi, deb xabar beradi Bosh prokuratura huzuridagi departament.
Ma’lum qilinishicha, departamentning Xorazm viloyati boshqarmasi tomonidan fuqarolarning murojaatlariga asosan tergovga qadar tekshiruv o‘tkazilgan. Tekshiruv davomida Urganch shahridagi “P.B.A.” xususiy korxonasi rahbari M.Sh. va norasmiy ishchisi X.X. 34 nafar fuqaroning nomiga soxta elektron aviachiptalarni rasmiylashtirgani aniqlangan. Ular chiptalarning har birini 3—3,5 million so‘mdan jami 106,2 million so‘m va 200 dollarga sotib, pul mablag‘larini firibgarlik yo‘li bilan qo‘lga kiritgan.
Mazkur holat yuzasidan Jinoyat kodeksining 168-moddasi (firibgarlik) va 228-moddasi (hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq Andijonda o‘ndan ortiq fuqaroga soxta “zagranpasport” tayyorlab bergan sobiq IIB xodimiga sud hukmi o‘qilgani, Namanganda soxta hujjatlar bilan o‘zganing o‘rniga imtihonga kirishga uringan shaxs aniqlangani, Namanganda tegishli ruxsatnomasiz Umraga yuborish uchun 66 nafar fuqarodan 162 ming dollar olgan tashkilot fosh etilgani to‘g‘risida xabar berilgandi.
Izoh (0)