Qozog‘iston Konstitutsiya kengashiga mamlakat asosiy qonunidan birinchi prezident maqomi va vakolatlari haqidagi normani olib tashlash haqida murojaat yuborildi. Sababi mamlakat birinchi rahbarining tarixiy o‘rni barchaga ma’lum va u davlatning asosiy qonuniga biriktirish ehtiyojiga ega emas, degan Qozog‘iston respublikasi davlat kotibi Yerlan Karin.
“Bugun Konstitutsiya kengashi asosiy qonunga o‘zgartirish kiritish bo‘yicha loyihaga ijobiy xulosa berdi. Shuningdek, ishchi guruh a’zolari tomonidan bildirilgan takliflarni inobatga olgan holda, Konstitutsiya kengashiga birinchi prezidentning maqomi haqidagi normani bekor qilish to‘g‘risida murojaat yuborilgan”, — deb yozgan Karin Telegram-kanalida.
“Ishchi guruh a’zolarining fikricha, birinchi prezidentning tarixdagi roli barchaga ma’lum va uni konstitutsiyada alohida belgilash zarurati yo‘q”, — degan u.
O‘z navbatida, konstitutsiyaga o‘zgartirishlar kiritish bo‘yicha ishchi guruh vakili Marat Bashimov jamoatchilik konstitutsiya islohotlarini deyarli to‘liq qo‘llab-quvvatlagani, xususan, asosiy qonundan respublika birinchi prezidenti maqomi haqidagi normani olib tashlash ham ijobiy qarshi olinganini qayd etdi.
“Mazkur norma birinchi prezidentga ikki muddatdan ko‘proq saylanish huquqini beruvchi, uning maqomi va vakolatlarini konstitutsiya va konstitutsion qonun bilan belgilab berish to‘g‘risida”, — deb yozgan Bashimov ijtimoiy tarmoqlarda.
Shu bilan birga, u jamoatchilikda Qozog‘iston mustaqilligining asoschisi sifatida birinchi prezident maqomini belgilovchi 91-moddani o‘z kuchida saqlab qolish keskin norozilik uyg‘otganini ta’kidlagan.
“Shuning uchun konstitutsiyaga kiritiladigan o‘zgartirishlarni tayyorlagan ishchi guruhning ayrim a’zolari davlat rahbariga asosiy qonundan birinchi prezidentning tarixiy roli haqidagi eslatmani olib tashlash taklifini yubordi, chunki ushbu jumlalar hech qanday huquqiy yuklamaga ega emas”, — deya ma’lum qilgan Bashimov.
“Ishchi guruh a’zolari fikrini hisobga olib, Konstitutsiya kengashiga qo‘shimcha murojaat yuborilgan. Kengashning yakuniy majlisida Konstitutsiyaga o‘zgartirishlar loyihasi yuzasidan yakuniy qaror chiqarilgan”, — deya qo‘shimcha qilgan u.
“Shu tariqa Konstitutsiyaga kiritiladigan o‘zgartirishlar haqidagi loyihaga muvofiq birinchi prezident maqomi va vakolatlari to‘g‘risidagi barcha normalar asosiy qonundan chiqarib tashlanmoqda”, — deya tushuntirgan Bashimov.
Avvalroq Qozog‘iston konstitutsiyasiga kiritiladigan o‘zgartirishlarda mamlakat mustaqilligining asoschisi, birinchi prezident Nursulton Nazarboyevning maqomi haqidagi normalar qaytadan yozilishi rejalashtirilgani xabar qilingandi.
Mavzuga doir: Qozog‘iston prezidenti Qosim-Jo‘mart To‘qayev hukmron Amanat partiyasi raisligidan ketdi
Mavzuga doir: Qozog‘istonda kambag‘allik darajasi ortib bormoqda
Izoh (0)