O‘rta Yer dengizida bortida jami 130 ga yaqin noqonuniy muhojir bo‘lgan uchta qayiq g‘oyib bo‘ldi. Ular halokatga uchrab, cho‘kib ketgan bo‘lishi mumkin, deya xabar berdi “RBK” Yevropaning SOS Mediterranee gumanitar tashkilotiga tayanib.
Foto: sosmediterranee.de
Ma’lum bo‘lishicha, tashkilotga Liviya qirg‘og‘ida halokatga uchrayotgan uchta kema to‘g‘risida xabar kelib tushgan. SOS Mediterranee’ning Ocean Viking kemasi va yana uchta savdo kemasi qidiruvga yo‘l olgan. Biroq yomon ob-havo sharoiti va olti metrgacha balandlikdagi to‘lqinlar ularning ishini murakkablashtirgan.
“Bugun voqea joyiga kelganimizdan beri, tirik qolgan biron kishini topmadik, ammo halokat sodir bo‘lgan joyda kamida o‘n kishining jasadiga duch keldik”, — deyiladi xabarda. Tashkilot mas’ul dengiz organlaridan hech qanday yordam olmaganini aytdi.
Noqonuniy muhojirlar ko‘pincha Afrikadan yoki Yaqin Sharqdan O‘rta Yer dengizi orqali Yevropaga qochishga harakat qiladi. 2018-yilda BMT ushbu yo‘nalishni migratsiya harakati bo‘yicha eng xavfli deb topdi.
Avvalroq Indoneziyaning Bali orolida bortida 53 nafar dengizchi bo‘lgan suvosti kemasi bedarak yo‘qolgan edi. Shuningdek, Bangladeshning Shitalakshya daryosida 50 nafar yo‘lovchini olib ketayotgan parom (solsimon yassi kema) yuk tashuvchi kema bilan to‘qnashib, cho‘kib ketishi natijasida besh kishi halok bo‘lgan.
Ungacha O‘rta Yer dengizining Tunis qirg‘oqlari yaqinida esa ichida noqonuniy ko‘chayotgan muhojirlar bo‘lgan ikkita qayiq ag‘darilib, cho‘kib ketgan edi. Qayiqlar Italiyaning Lampeduza oroli tomon ketayotgan edi. Halokat oqibatida kamida 39 kishi halok bo‘lgan.
