O‘ziga ishonchi past, duduq qizchadan Gollivud yulduzigacha bo‘lgan yo‘l: Emili Blantning aktrisalik faoliyati haqida

“Qattiqqo‘l xonim” filmining sujeti o‘zingni to‘liq ishga bag‘ishlamasdan turib, yuksaklikka erisha olmaysan, g‘oyasiga asoslangan. Moda jurnali rahbarining eng yaxshi yordamchisi bo‘lish uchun qiyin yo‘lni bosib o‘tish kerak. Ushbu filmda qo‘rs yordamchi rolini o‘ynagan Emili Blant real hayotda ham uzoq yo‘lni bosib o‘tdi va jahon kinosining yulduzlaridan biriga aylandi.

Bolaligidagi duduqlanishi Emiliga omad keltirdi

Emili Blant Londonning janubi-g‘arbiy qismida advokat va sobiq aktrisa oilasida tug‘ilgan. 14 yoshgacha u duduqlanishdan aziyat chekdi. Bu muammodan qutulish uchun u aktyorlik darslariga qatnay boshlaydi. Keyinchalik shu narsa sabab dastlab tarjimon bo‘lishni xohlagan bo‘lsa-da, uning joyi sahnada ekanini tushundi

“Men haqiqatan ham aktrisa bo‘lishni xohlamasdim va bunga ataylab qarshilik ham qilganman. Doimo gapirish shart bo‘lgan ishim bo‘lishini tasavvur qila olmasdim”, — deydi Emili. Ammo bu muammo, aksincha muvaffaqiyatga hissa qo‘shdi.

“Duduqlanish menga ko‘p jihatdan ta’sir qilgan. Siz hamdardlikni o‘rganasiz va odamlarni diqqat bilan kuzatasiz, chunki ko‘pincha gapira olmaysiz. Suhbatdoshingizning har bir jihatini o‘rganib chiqasiz, u sizni masxara qiladimi yoki tushunadimi? O‘ylaymanki, bu meni yanada ziyrak qildi”, — deydi Emili.

Hozirda aktrisa Amerika duduqlanish institutini faol qo‘llab-quvvatlaydi va bu muammoga e’tiborni jalb qilish uchun uning konferensiyalarida qatnashadi. “Nutqingiz sizni kim ekanligingizni belgilamaydi. Duduqlanish — bu siz emas, balki sizning bir qismingiz xolos”, — deydi aktrisa bu kasallikka chalingan odamlarga.

U o‘z karyerasini professional rol bilan boshlagan

16 yoshida Emili xususiy kollejning drama, violonchel va qo‘shiqchilik yo‘nalishi bo‘yicha o‘qishga kirdi. U 2000-yilda Edinburg xalqaro festivalida boshqa talabalar bilan birga chiqish qildi. Aynan o‘sha yerda agent Kennet Makreddi e’tiboriga tushdi va u bilan kelgusida hamkorlik to‘g‘risida shartnoma imzoladi.

Emili “Qirollik oilasi” filmida Gven Kavendish roli bilan professional debyutini boshladi. Keyin Evening Standard gazetasi unga “Eng yaxshi yosh aktrisa” unvonini berdi. Shundan keyin teatrda ham ko‘plab rollarni ijro etdi. Misol uchun, Chichester festival teatrida “Romeo va Julietta” spektaklida bosh rolni o‘ynadi.

Odamlarni tushuna olish qobiliyati tufayli u ta’sirchan va murakkab personajlarni yaxshi o‘rgandi

“Mening muhabbat yozim” dramasida rol o‘ynagan aktrisa e’tiborga tushdi. Emili va uning hamkasbi o‘z qahramonlarini chuqur anglaganliklari uchun maqtovga sazovor bo‘lishdi. Blant ikkinchi marta Evening Standard tomonidan “Eng istiqbolli yosh aktrisa” deb topildi.

2006-yilda Emili Blant ota va qiz o‘rtasidagi murakkab munosabatlar haqida hikoya qiluvchi “Gideonning qizi” filmida rol o‘ynadi. Uning qahramoni Natasha tashqi tomondan xotirjam ko‘rinsa-da, aslida otasidan juda g‘azablangan va ranjigan. Ushbu ko‘p qirrali, murakkab roli tufayli Blant “Oltin globus” mukofoti sovrindori bo‘ldi.

“Qattiqqo‘l xonim” filmidagi rolni Emili parvozga kechikkani tufayli qo‘lga kiritgan

Ammo o‘sha yillardagi eng katta mashhurlikni unga moda jurnali rahbarining katta yordamchisi roli keltirdi. “Qattiqqo‘l xonim” filmi ajoyib muvaffaqiyatga erishdi. Blant esa Britaniya akademiyasining “Eng yaxshi ikkinchi plandagi ayol roli” mukofotiga nomzod bo‘ldi.

Emili bu rol uchun kastingdan qanday o‘tganini shunday eslaydi: “Kasting Los-Anjelesdagi Fox Studios’da bo‘lib o‘tdi va meni butunlay hayratda qoldirdi. Chunki bu men uchun yangilik edi, u paytda 22 yoshda edim. O‘shanda qanchalik asabiylashganimni yaxshi eslayman, chunki parvozga kechikayotgandim”.

“Men biror joyga kechikib borishni yomon ko‘raman. Ammo bu menga yordam berdi: kastingda juda bezovtalandim. O‘sha kayfiyatimda asabiy yordamchi roliga juda mos tushdim”, — deydi aktrisa.

Emili yangi roliga tayyorgarlik ko‘rish uchun 3 oygacha sport zalidan chiqmagan

Qiyinchiliklar va mag‘lubiyat har doim g‘alaba va omad bilan yonma-yon keladi. Emili bosh rolni o‘ynagan “Bo‘ri odam” filmi tanqidga uchradi. U hatto barcha davrlarning eng muvaffaqiyatsiz filmlaridan biri deb topildi.

Ammo aktrisa tushkunlikka tushmadi,  “Ertangi kun” filmini suratga olishga to‘liq 3 oy tayyorgarlik ko‘rdi. Blant hech bir mashg‘ulotni o‘tkazib yubormadi: gantel, sprint, yoga, tross, gimnastika.

Natija esa shunga arzirdi: film katta muvaffaqiyat va ko‘plab ijobiy baho oldi. Emili Teen Choice Awards mukofotining “Eng yaxshi ayol roli” nominatsiyasida g‘olib chiqdi.

“Poyezddagi qiz” filmidagi Emilini o‘z eri ham tanimagan

Yana bir triller “Poyezddagi qiz” sujeti sayozligi uchun qattiq tanqid qilindi. Ammo Emili ommaviy ravishda ushbu filmning najoti deb nomlandi. Rolling Stone jurnali Blantning ijrosini yuqori baholab, uni xarakterga chuqur kirib boradigan mahoratli aktrisa deb atadi.

Aktrisaning eri Emilining ushbu filmdagi roli haqida shunday deydi: “Umrimda birinchi marta bu mening xotinim ekanligini unutib qo‘ydim”. Aktrisaning o‘zi bu roli haqida shunday fikrda: “Men uning kulgili ko‘rinishini xohlamadim. Bu qahramonning atrofida bo‘lish yoqimsiz, noqulay va hatto xavfli bo‘lib tuyulishi kerak edi”.

“Men bu mavzuni keng o‘rganishim kerak edi, eng to‘g‘ri yo‘l u kabi muammoga duch kelgan odamlar haqidagi hujjatli filmlarni tomosha qilish edi. Ammo shuni ham unutmaslik kerakki, film portret emas, balki triller. Tomoshabinni ishontira olish kerak”, — deb eslaydi Emili.

Aktrisaga turmush qurish taklif qilinganda atrofdagilar ham yig‘lab yuborgan

Ko‘plab muxlislar yulduzli juftliklar hayotini hayajon bilan kuzatishadi. Xuddi shunday Emilining amerikalik aktyor Jon Krasinski bilan munosabatlari ham ko‘pchilikni qiziqtiradi. Juftlik 10 yildan ortiq birga, hammasi restorandagi umumiy hazildan boshlangan.

O‘sha paytda Emili “Qattiqqo‘l xonim” filmidagi roli bilan tanilgan edi. Jon Emili bilan tasodifiy to‘qnash kelishidan oldin uni kuzatgan, qizdan ko‘zini uzolmagan. Tanishganlaridan bir yil o‘tmay, sevishganlar unashtirilgan.

Krasinski Emiliga turmush qurishni taklif qilgan o‘sha lahzani juda yaxshi eslaydi: “O‘shanda hamma yig‘lagan: men, Emili va atrofdagilar. Menimcha, odamlar nima bo‘layotganini unchalik tushunishmagan, shunchaki biz yig‘laganimiz uchun ko‘zlariga yosh kelgandir. Ammo zo‘r bo‘lgan edi”. Hozirda er-xotinning ikkita qizi bor — Heyzel va Violet.

Emili erini xafa qilmaslik uchun “Sokin joy” filmi ssenariysi haqida gapirmaydi

2018-yilda juftlik tomoshabinlar ham uzoq vaqtdan beri kutgan maqsadiga erishdi. Bu Emili va Jon er-xotin rolini o‘ynagan “Sokin joy” filmi edi. Filmga Krasinskiyning o‘zi rejissorlik qildi. Avvaliga turmush o‘rtoqlarning hech biri Emili bosh rolda bo‘lishini rejalashtirmagan. Ammo ssenariyni o‘qib chiqqach, Blant erini unga bosh rolni berishga ko‘ndirgan.

“U ssenariy yozayotganda men emas, boshqalar uni tanqid qilishi muhim edi. Chunki men juda to‘g‘riso‘zman. Menda hammada bo‘ladigan diplomatiya yo‘q”, — deb eslaydi aktrisa kulib.

Juftlik filmni qo‘llab-quvvatlash uchun birgalikda dunyo bo‘ylab sayohat qildi va tok-shoularda bir-birlari bilan hazillashishi ularning mashhurligini oshirdi. Emili “Sokin joy” filmidagi roli uchun Kinoaktyorlar gildiyasi mukofotiga sazovor bo‘lganida,  bu g‘alabani turmush o‘rtog‘i bilan baham ko‘rgan holda eri va hamkasbiga minnatdorlik bildirdi.

Hozirda Emili Blant 2023-yilda ekranga chiqishi kutilayotgan taniqli rejissor Kristofer Nolan va uning jamoasi tomonidan suratga olinayotgan “Oppengeymer” nomli biografik filmda suratga tushmoqda.