“Opa-singillar” 10 yoshda: serial qanday suratga olingan? Bosh qahramonlar hozir qanday ko‘rinishda va nima bilan band?

Keyingi paytlarda yangi nomdagi seriallar tez-tez efir yuzini ko‘ryapti. Ba’zan ularning ko‘pligi va aktyorlar jamoasining bir-biriga o‘xshashligidan tomoshabin ham chalkashib ketadi. Ammo 10-15 yillar avval telekanallar ham, ularda namoyish etiladigan seriallar ham kam edi. Rejissor Zamira Begimqulovaning “Gulxan atrofidagilar”, “Tutash taqdirlar” va “Opa-singillar” kabi ijodiy ishlari serial taqchilligi davrida efir yuzini ko‘rgandi. Shu bois o‘zbek tomoshabinlari orasida bu serialni bilmaydiganlar deyarli topilmasa kerak.

2022-yilda “Opa-singillar” seriali ilk marta televideniye orqali namoyish etilganiga 10 yil to‘ldi. Shu munosabat bilan “Daryo” muxbiri Nargiza Murodova serial rejissori, O‘zbekistonda xizmat ko‘rsatgan madaniyat xodimi Zamira Begimqulova bilan suhbatlashdi. Rejissor suhbat davomida serialning suratga olinishi bilan bog‘liq qiziqarli ma’lumotlarni oshkor etdi.

Serial olinishiga o‘g‘il ko‘rolmaslikda ayblangan ayollar sabab bo‘lgan

— “Tutash taqdirlar” seriali namoyish etilganidan so‘ng, Nazar Eshonqul “Opa-singillar” seriali g‘oyasi ustida ishlashni taklif etdi. O‘sha yillari qiz farzand ko‘rgani uchun ajrimlar soni ortgani, o‘g‘il farzand ko‘rolmayotgan ayollar ruhiy tushkunlikka tushib qolgani haqidagi gap-so‘zlar tez-tez quloqqa chalinardi. Nazar Eshonqulning asosiy qahramoni Nafisa (Gavhar Sharipova ijro etgan) bo‘lishi kerak edi. Ammo ssenariy yozilish jarayonida qo‘shimcha personajlar hayoti ham ochilgan. Masalan, serial avvalida Nafisaning singillari Nasiba va Shahnozaga alohida e’tibor berilmagandi. Ammo ular orqali ma’lum bir muammolarni olib chiqishimiz mumkinligini hisobga olib, bu personajlarning ham serialdagi o‘rnini kengaytirganmiz.

“To‘rt yil dam olishsiz ishladim”

— 2010-yilda “Opa-singillar” serialini suratga olishni  boshlaganmiz. 2012-yili esa uning ilk qismi ekran yuzini ko‘rgan. Ijodiy guruh 4 yilda 140 qismli serial suratga olishga muvaffaq bo‘lgan. Hozirgi ba’zi serialchilar nazarida bu uzoq muddatdek tuyulishi mumkin, ammo o‘sha vaqtdagi sharoit va badiiy saviyaga bu juda yaxshi natija edi. Birinchi faslining ovozlashtirish ishlari yakunlanmay turib, efirdan olib tashlangan turk seriali sabab yarim tayyor ishimiz efir yuzini ko‘rgan. Kunim dublyaj, montaj va syomka maydonchasida o‘tadigan bo‘lib qolgan. To‘rt yil davomida hech qanday dam olish kunisiz ishlashimga to‘g‘ri kelgan. Agar hozirgi “O‘zbektelefilm”dagi tartib bo‘yicha ishlaganimizda, 140 qismli serial uchun kamida 6-7 yil ishlashimiz kerak edi.

“Gavhar Sharipova bilan ishlash qiyin edi”

— Oldindan Gavhar Sharipova bilan ishlash qiyin ekanligini bilardim. Ko‘zimni yumib bo‘lsa-da, u bilan ishlashga qaror qilganman. Rahmatli Gavhar Sharipova yaxshi aktrisa edi, ammo fe’l-atvori og‘ir bo‘lgani uchun hamma undan qochardi. Rollar taqsimlanganida operator Sa’dulla O‘rinboyev oldimga kelib: “Opa, Gavharning qandayligini yaxshi bilardingiz-ku, yana u bilan ishlaysizmi?” degandi. Haqiqatan ham “Gulxan atrofidagilar” serialida Gavhar bilan ba’zi muammolar kelib chiqqandi. Ammo Gavharning ko‘zlarida dard bor edi. Syomka maydonchasiga o‘z vaqtida kelardi, aytilgan vazifani bajarardi. Ammo sho‘rlik puldan ancha qiynalardi. “Menga ko‘proq gonorar yozing, ahvolimni bilasiz-ku”, derdi. “Opa-singillar” serialining birinchi va ikkinchi fasllarida yaxshi ishlaganmiz. Ammo uchinchi fasli suratga olinayotganda ko‘p tortishganmiz, aksiga olib u roldan chetlashtirolmasligimni bilib, ko‘proq pul berishimni so‘rardi. Men ajratilgan puldan ortig‘ini berolmasligimni tushuntirardim. Xullas, kadr ortida mana shunday muammolar bo‘lgan. Serial prodyuseri Muzaffar Sa’dullayev (“Osmondagi bolalar” filmidagi Hamdam serialga prodyuserlik qilgan) bilan Gavharni rozi qilish uchun qo‘ldan kelgancha harakat qilgandik.

“Rasulxonni rolga chaqirmayman, deb ahd qilgandim”

— Ikrom roliga ham ham ba’zi muammolar bo‘lgan. Rasulxon Qodirxonovni “Tutash taqdirlar” serialiga taklif etgandim. Rolga tasdiqlanib, suratga olish ishlari boshlanishiga oz qolganida “Men teatrga ishga kiryapman, rahbarlar syomkalarga borishimni taqiqlashdi”, degan. Shundan keyin undan ranjib, endi rollarga taklif etmayman, deb ahd qilgandim. Ikrom roliga Elbek Fayziyevni olgandim. Ammo Nazar Eshonqul “Elbekda qashqadaryolik yigitlarga xos shaxt va shiddat bor. U o‘zbekning Romeosi yoki Otabegi bo‘lolmaydi”, degandi. Bu haqida uzoq o‘yladim. “O‘tkan kunlar”dagi Otabek ham ota-onasiga qarshi chiqolmaganidek, Ikrom ham shunday bo‘lishi kerak, degan to‘xtamga keldim. Ammo “Rasulxonni rolga chaqirmayman”, degan ahdim sabab boshqa aktyorlarni ham sinab ko‘rganman. Ijro yaxshi bo‘lsa-da, ulardan ssenariydagi Ikromni topolmaganman. Shunday keyin Rasulxon Qodirxonovni rolga chaqirganman.

“Klon” serialidan olingan personaj

— “Klon” serialini ko‘rganlar bo‘lsa, yaxshi bilishadi. Unda ko‘zlari ayyor va o‘ta ustomon Aliseniya degan obraz bor. Roldan ta’sirlanib yurganimda, xuddi shu aktrisani boshqa filmda ham uchratdim. Ikki rol bir-biridan tubdan farq qilardi. Yosh aktrisa Zahro Mirzayevani moslab, Aliseniyaga o‘xshash personaj yaratishga qaror qildim. Aktrisa “opa-opa” deb odamlarning ishonchini oladigan ayyor ayol rolini maromiga yetkazib ijro etgan.

Serial “Osmondagi bolalar”dagi Hamdamning uyida olingan

— Serial syomkalari juda uzoq vaqt davom etadi. Bu vaqt mobaynida uy egalari uy qurilishi va jihozlarning joylashuvini o‘zgartirmasliklari kerak. Albatta, bu narsa hammaga yoqmaydi. “Mehmonning izzati uch kun” deyishganidek, serialchilar ham tezda ularning joniga tegib qoladi. “Tutash taqdirlar” serialida uy-joy bilan bog‘liq muammolarga ko‘p uchraganmiz. Muzaffar Sa’dullayev muammo chiqmasligi uchun syomkaga o‘zi va qarindoshlarining uyini bergan. To‘rt yil davomida ulardan beminnat foydalanganmiz.

Serialda bosh qahramonlarni gavdalantirgan aktyorlar

O‘tgan vaqt mobaynida “Opa-singillar” serialida aktyor va aktrisalarning hayoti va faoliyatida jiddiy o‘zgarishlar bo‘lgani aniq. Хo‘sh, serial bosh qahramonlari ayni kunlarda nimalar bilan band?

Serialda Diyora rolini ijro etgan Kamola Arslonova sakkiz yildan buyon Turkiyada yashaydi. Diyora taxallusi bilan ham ijod qilib, o‘nlab qo‘shiqlar ijro etgan aktrisa 2014-yilning dekabr oyida turkiyalik Mesut ismli tadbirkorga turmushga chiqqan. Ayni paytda Izmir shahrida oilasi bilan baxtli hayot kechirayotgan Kamola Arslonova ikkinchi farzandiga homilador. Uning to‘rt yoshli Axsen ismli qizi ham bor.

Ikrom rolini ijro etgan aktyor Rasulxon Qodirxonov Muqimiy nomidagi O‘zbekiston davlat musiqiy teatrida faoliyat yuritadi. U 25 yoshida “Opa-singillar” serialida suratga tushgan.

Nargiza Shermatova 21 yoshida “Opa-singillar” serialida Nasiba rolini ijro etgan. U hozirgi kunda oilali va farzandi Yasinbekning tarbiyasi bilan band.

Aziz Qobilov “Opa-singillar” seriali orqali debyut rolini ijro etgan. U ayni kunda O‘zbek milliy akademik drama teatrida faoliyat yuritadi.

Serialda Javlon rolini ijro etgan aktyor Elbek Fayziyev hozirgi kunda suratga olinayotgan ko‘plab tarixiy filmlarda suratga tushmoqda. U “Mendirman Jaloliddin” serialida ham ajoyib rolni ijro etgan.

“Opa-singillar” serialida Murod rolini ijro etgan aktyor Behzod Mirzayev hozirgi kunda O‘zbekiston davlat san’at va madaniyat institutida talabalarga aktyorlik mahorati fanidan saboq beradi.

Serialdagi asosiy qahramon Nafisa rolini ijro etgan aktrisa Gavhar Sharipova 2019-yili vafot etgan.