Moskvada 9-may kuni Ikkinchi jahon urushidagi g‘alabaning 77 yilligiga bag‘ishlab o‘tkaziladigan paradga xorijiy davlatlar yetakchilaridan birortasi kelmaydi. Bu haqda Rossiya prezidentining matbuot kotibi Dmitriy Peskov jurnalistlarga ma’lum qildi.
“G‘alaba bayramiga xorijlik yetakchilardan hech birini taklif qilmadik. Gap shundaki, bu yubiley sanasi emas. Bu bizning bayramimiz, bu butun Rossiya uchun, rossiyaliklarning barchasi uchun muqaddas bayram”, — dedi Peskov.
Kreml matbuot kotibining qo‘shimcha qilishicha, Aleksandr Lukashenkoning ham Moskvadagi G‘alaba paradida ishtirok etishi rejalashtirilmagan.
Rossiya Mudofaa vazirligi ma’lumotlariga ko‘ra, 2022-yilning 9-may kuni Moskva shahrida bo‘lib o‘tadigan G‘alaba paradida jami 11 ming harbiy xizmatchi, 131 ta qurol-yarog‘, harbiy va maxsus texnika, shuningdek, 77 ta samolyot va vertolyotlar ishtirok etadi.
2021-yilda G‘alaba paradiga xorijiy yetakchilardan faqat Tojikiston rahbari Emomali Rahmon tashrif buyurgandi. 2020-yilda esa qator davlatlar rahbarlari bilan birga O‘zbekiston prezidenti Shavkat Mirziyoyev ham Moskvadagi parad mehmoni bo‘lgan.
Ukrainadagi urush fonida Moldova va Isroil shuningdek, tan olinmagan Dnestrbo‘yi kabi ayrim davlatlar joriy yil G‘alaba paradi o‘tkazmasligini ma’lum qilgandi. Qozog‘istonda esa koronavirus pandemiyasi sabab ketma-ket uch yildan buyon 9-may kuni harbiy parad o‘tkazilmayapti.
Izoh (0)