2022-yilning 25-30-aprel kunlari Xiva shahri mezbonlik qilayotgan “Lazgi” xalqaro raqs festivaliga 26-aprel kuni start berildi.
“Daryo” muxbirining ma’lum qilishicha, O‘zbekistonda ilk bor o‘tkazilayotgan mazkur yirik tadbirning ochilishi marosimi “Ichan qal’a”ning ko‘hna Ark maydonida bo‘lib o‘tgan. Festival avvalida ishtirokchilarga Prezident Shavkat Mirziyoyevning tabrigi o‘qib eshittirilgan.
Madaniyat vaziri Ozodbek Nazarbekovning OAV vakillariga qayd etishicha, festivalda dunyoning 30 ta davlatidan 175 nafardan ziyod raqs san’ati ustalari, professional raqs jamoalari, san’atshunos olimlar, madaniyat sohasining taniqli namoyandalari hamda ommaviy axborot vositalari vakillari tashrif buyurgan.
Festival doirasida o‘tkaziladigan tanlovda 18 davlatdan 160 ishtirokchi qatnashishi rejalashtirilgan. Tanlovni oltita turli davlatdan 6 nafar tajribali, professional hakam baholab boradi.
“Ayni damda ilmiy-amaliy konferensiyada ishtirok etish uchun 11 davlatdan 13 nafar san’atshunos olimlar Xiva shahriga yetib kelgan”, — deydi Nazarbekov.
Ochilish marosimining badiiy qismida turli millat va xalqlarning o‘ziga xos kuy-qo‘shiqlari yangradi, jozibador raqslari ijro etildi. O‘zbekistonlik taniqli san’atkorlar tomonidan kuylangan taronalar esa qatnashchilarni raqsga chorladi.
Eslatib o‘tamiz, 2020-yil 29-sentabrda 2022-yildan boshlab har ikki yilda bir marotaba“Lazgi” xalqaro raqs festivalini tashkil etish va o‘tkazish to‘g‘risida prezident qarori e’lon qilingandi.
Qarorga bilan festivalni o‘tkazish tartibi to‘g‘risidagi nizom ham tasdiqlangan bo‘lib, unga ko‘ra, “Lazgi” raqs tanlovi 3 ta nominatsiya (“Eng yaxshi yakkaxon raqs ijrochisi”, “Eng yaxshi raqs jamoasi” va “Eng yaxshi sahnalashtirilgan raqs”) bo‘yicha baholanadi.
Tanlov g‘oliblari quyidagi miqdorda pul mukofotlari bilan taqdirlanadi:
- Gran-pri — 7000 dollar;
- 1-o‘rin — 5000 dollar;
- 2-o‘rin — 3000 dollar;
- 3-o‘rin — 2000 dollar.
Izoh (0)