“Tashabbusli budjet” loyihasining ilk mavsumi yakunlanib, 2022-yilning 1-aprel kuni g‘oliblari e’lon qilindi. Moliya vazirligining ushbu loyihasi aholi o‘rtasida katta qiziqish uyg‘otdi, ovoz to‘plash jarayonlari ancha qizg‘in kechdi. Fuqarolar o‘z tashabbusi g‘olib chiqishi uchun faol harakat qilib, ovoz yig‘ish jarayonida o‘ziga xos yo‘llardan foydalandi. Ijtimoiy tarmoqlarda turli aksiyalar o‘tkazish, ovozlarni pulga sotib olish holatlari kuzatildi.
Hamjihatlikda yutuqqa erishib, loyihada g‘oliblikni qo‘lga kiritgan mahallalar o‘z muvaffaqiyatlarini karnay-surnay bilan nishonladi. Hatto mushakbozlik qilib, bu yutuqni bayramga aylantirib yuborganlar bo‘ldi. Uchko‘prik tumanidagi “Katta qashqar” mahalla fuqarolar yig‘ini aholisi “Tashabbusli budjet” loyihasida uchta taklif uchun 2 milliard 200 million so‘m mablag‘ni qo‘lga kiritdi.
“Daryo” muxbiri mazkur mahallada bo‘lib, ovoz yig‘ish jarayoni qanday o‘tgani bilan qiziqdi. Ovoz to‘plashda faollik ko‘rsatgan yoshlar va nuroniylar bilan suhbatlashdi.
Qayd etilishicha, mahalla faollari hududdagi ijtimoiy muammolarni hal etishga qaratilgan to‘rtta taklifni ilgari surgan. Ovoz berish jarayonida keksa-yu yosh hamjihatlikda harakat qilib, yakunda ichimlik suv ta’minoti, yo‘l hamda maktab sport zalini ta’mirlash bo‘yicha uchta loyihani yutib olgan.
“Mahallamiz aholisi nomidan ‘Tashabbusli budjet’ loyihasiga to‘rtta taklif kiritgan edik. Loyihada ko‘p ovoz to‘plagan uchta taklifimiz g‘olib bo‘ldi. Mahalla hududidagi to‘rtta ko‘chani asfaltlash uchun 1 milliard 80 million so‘m, ‘Pastki dasht’ mahallasiga ichimlik suv tarmog‘i tortish uchun 700 million so‘m, 22-maktabning sport zalini ta’mirlash uchun 420 million so‘m mablag‘ yutib oldik. ‘Tashabbusli budjet’ loyihasida respublika bo‘yicha eng ko‘p mablag‘ni qo‘lga kiritgan mahalla bo‘ldik. Bu yutuqni xalqimiz katta xursandchilik bilan kutib oldi. Ovoz berish yakunlangan kuni yarim kechasi bo‘lishiga qaramasdan g‘alabani karnay-surnay bilan nishonladik. Bayramga, to‘yga aylanib ketdi bu tadbir. Barchani ko‘z o‘ngida, ochiq ovoz berish yo‘li bilan g‘oliblar aniqlanadigan bu loyiha xalqimizning ko‘nglidagi ish bo‘ldi”, — deydi “Katta qashqar” mahalla fuqarolar yig‘ini raisi Ibrohim Xolmatov.
Aholi vakillarining aytishicha, mahallaning qishda loy-ko‘lmak, yozda changga botadigan ichki yo‘llari uzoq yillardan beri asfalt ko‘rmagan. Ustiga-ustak, hududda maktab va bolalar bog‘chasi joylashgan. Yog‘ingarchilik vaqtida bu yo‘llardan yurish nafaqat yosh bolalarga, balki kattalarga ham birdek qiyinchilik tug‘dirgan. “Tashabbusli budjet”dan yutib olingan 1 milliard 80 million so‘m evaziga mahalladagi to‘rt kilometr ichki yo‘llar asfaltlanadi.
“Mahallamizdagi ichki yo‘llarning aksariyati ta’mirga muhtoj. Mana shu ko‘chalar oxirgi marta qachon asfalt qilingani yoki ta’mirlanganini bilmayman. Ko‘chalarimiz yozda changga, qishda loyga botadi. Bu yerda bolalar bog‘chasi, maktab bor. Bolalar, ularni bog‘chaga olib keladigan ota-onalar, maktab o‘quvchilariga yog‘in-sochinli kunlarda bu yo‘llardan yurish qiyinchilik tug‘diradi. Shuning uchun, ‘Tashabbusli budjet’ loyihasi haqida eshitib, portalga mahallamiz ko‘chalarini ta’mirlash bo‘yicha taklif kiritdik. Tuman bo‘yicha eng ko‘p ovoz to‘plab, 1 milliard 80 million so‘m mablag‘ yutib oldik. Ovoz to‘plash jarayoni oson kechmadi. Yigirma kun davomida kecha-yu kunduz harakat qildik. Ko‘chama ko‘cha, xonadonma-xonadan yurib ovoz yig‘dik. Avval mahalladagi, keyin tumandagi uylarga birma-bir kirib chiqdik. Hatto, ovoz to‘plash uchun Andijon, Namangan va Toshkent viloyatlariga ham borib keldik. Qayerda odam ko‘p to‘plansa, o‘sha yerga biz ham yetib bordik. Yuzlab, minglab odam to‘planadigan konsert dasturlariga, futbol o‘yinlariga borib ovoz to‘plashga harakat qildik. Boshida bu ishimizga shubha bilan qaragan, ishonmagan odamlar ko‘p bo‘ldi. Ko‘pchilik shuncha pulni sizlarga kim berib qo‘yardi, bekorga ovora bo‘lyapsizlar dedi. Xonadonlarga kirganda, gap eshitib, quvib yuborilgan paytlarimiz ham bo‘ldi. Mana, xudoga shukur, yuzimiz yorug‘ bo‘ldi, loyihada yutib chiqdik. Xursandchiligimiz cheksiz”, — deydi “Katta qashqar” mahallasida yashovchi fuqaro.
“Pastki dasht” mahallasi aholisi uzoq yillardan beri ichimlik suv muammosidan aziyat chekkan. Mahallada yashovchi fuqarolar suvni qariyb ikki kilometr masofadan tashib kelgan. Ushbu muammoga ham tashabbusli budjet jarayoni yechim bo‘ldi. Endi 700 million so‘m mablag‘ evaziga mahallada yangi quduq qazilib, uch ming metr ichimlik suv tarmog‘i tortiladi. Natijada hududdagi 100 dan ortiq xonadon toza ichimlik suv bilan ta’minlanadi.
“‘Pastki dasht’ mahallasida ancha yillardan beri ichimlik suv muammosi bor edi. Yo uzoq masofadan tashib kelardik yo ariqdagi suvdan ichardik. Shuning uchun ‘Tashabbusli budjet’ loyihasida o‘z taklifimiz bilan qatnashdik. Yoshlarimiz harakat qilishib, uyma uy yurishib, ovoz yig‘ishdi. 700 million so‘m yutib oldik. Juda xursand bo‘ldik. Shu ishni boshida turganlarni ko‘plashib duo qildik. Endi bu mablag‘ga 3 kilometr joyga ichimlik suv tarmog‘i tortamiz”, — deydi mahalla faoli Rahimjon Usmonov.
Bundan tashqari, “Katta qashqar” mahallasida joylashgan 22-maktab o‘qituvchilari va ota-onalar hamjihatlikda sport zali ta’miri uchun 420 million so‘mlik loyihani yutib oldi.
O‘zbekiston tumani “Ko‘l elash” mahallasi aholisi o‘z ko‘chalari ta’miri uchun bildirgan takliflari ovoz berish jarayonida g‘olib bo‘lganini tantana qildi.
Mahalla raisi Shuhratjon Rahmonovning aytishicha, fuqarolar yig‘inida oltita ko‘cha mavjud. Mahalladagi 14 kilometrdan ortiq ichki yo‘llarning to‘qqiz chaqirimiga umuman asfalt yotqizilmagan. “Tashabbusli budjet” loyihasida yutib olingan 900 million so‘m evaziga mahallaning 2 ming 500 metr ichki yo‘llar asfalt qilinadi.
Shu mahallada yashovchi Shahboz Maqsudovning ta’kidlashicha, ovoz yig‘ish jarayonida yoshlar ham faol harakat qilgan. Ijtimoiy tarmoqlarda maxsus guruhlar ochib, xonadonma-xonadon yurib, ovoz to‘plashgan.
“Mahallamizdagi ichki yo‘llar ta’mirga muhtojligi sababli yoshi kattalar bilan maslahatlashib, ochiq budjet portaliga taklif kiritdik. Xudoga shukur, to‘qqiz mingga yaqin ovoz bilan tumanda birinchi o‘rinni oldik. Bu natijaga erishish oson bo‘lmadi. Boshida bu loyiha nima ekanligini ko‘pchilik tushunmadi. Uyma uy yurib, hammaga taklifimizni tushuntirib chiqdik. Tunu kun harakat qilib, 900 million so‘mlik loyihani yutib olishga erishdik”, — deydi Shahboz Maqsudov.
O‘zbekiston tumani moliya bo‘limi xodimi Oybek Toshqo‘ziyevning ma’lum qilishicha, tumanda ‘Tashabbusli budjet’ loyihasida eng ko‘p ovoz olgan 18 ta taklif g‘olib deb topilgan.
“Moliya vazirligi tomonidan ochilgan ochiq budjet (“openbudget.uz”) portali orqali fuqarolar tomonidan tuman bo‘yicha 220 ta taklif shakllantirilgan. Ulardan ishchi guruh tomonidan nizom talabalariga asosan saralangan 134 ta taklif egalariga tegishli tartibda xabarnoma yuborildi. Ovoz berish jarayoni yakunlariga ko‘ra, fuqarolar tomonidan 134 taklifga 130 ming 788 ta ovoz berildi. Eng ko‘p ovoz olgan 18 ta taklif g‘olib deb topildi. Ushbu takliflarning qiymati 10 milliard 200 million so‘mni tashkil etadi”, — deydi O‘zbekiston tumani moliya bo‘limi xodimi Oybek Toshqo‘ziyev.
Ma’lumot uchun, Farg‘ona viloyati bo‘yicha fuqarolar tomonidan jo‘natilgan 2 ming 178 ta taklifdan umumiy qiymati 115,4 milliard so‘m bo‘lgan 204 ta taklif “Tashabbusli budjet” loyihasida g‘olib deb topilgan. Ovoz berish jarayonlarida 1 million 126 ming 754 nafar yurtdoshimiz qatnashgan. G‘olib deb topilgan tashabbuslar soni bo‘yicha Farg‘ona respublika hududlari orasida Toshkent viloyatidan keyin ikkinchi o‘rinni egallagan.
Izoh (0)