«Ташаббусли бюджет» лойиҳасининг илк мавсуми якунланиб, 2022 йилнинг 1 апрель куни ғолиблари эълон қилинди. Молия вазирлигининг ушбу лойиҳаси аҳоли ўртасида катта қизиқиш уйғотди, овоз тўплаш жараёнлари анча қизғин кечди. Фуқаролар ўз ташаббуси ғолиб чиқиши учун фаол ҳаракат қилиб, овоз йиғиш жараёнида ўзига хос йўллардан фойдаланди. Ижтимоий тармоқларда турли акциялар ўтказиш, овозларни пулга сотиб олиш ҳолатлари кузатилди.
Ҳамжиҳатликда ютуққа эришиб, лойиҳада ғолибликни қўлга киритган маҳаллалар ўз муваффақиятларини карнай-сурнай билан нишонлади. Ҳатто мушакбозлик қилиб, бу ютуқни байрамга айлантириб юборганлар бўлди. Учкўприк туманидаги «Катта қашқар» маҳалла фуқаролар йиғини аҳолиси «Ташаббусли бюджет» лойиҳасида учта таклиф учун 2 миллиард 200 миллион сўм маблағни қўлга киритди.
«Дарё» мухбири мазкур маҳаллада бўлиб, овоз йиғиш жараёни қандай ўтгани билан қизиқди. Овоз тўплашда фаоллик кўрсатган ёшлар ва нуронийлар билан суҳбатлашди.
Қайд этилишича, маҳалла фаоллари ҳудуддаги ижтимоий муаммоларни ҳал этишга қаратилган тўртта таклифни илгари сурган. Овоз бериш жараёнида кекса-ю ёш ҳамжиҳатликда ҳаракат қилиб, якунда ичимлик сув таъминоти, йўл ҳамда мактаб спорт залини таъмирлаш бўйича учта лойиҳани ютиб олган.
«Маҳалламиз аҳолиси номидан ‘Ташаббусли бюджет’ лойиҳасига тўртта таклиф киритган эдик. Лойиҳада кўп овоз тўплаган учта таклифимиз ғолиб бўлди. Маҳалла ҳудудидаги тўртта кўчани асфальтлаш учун 1 миллиард 80 миллион сўм, ‘Пастки дашт’ маҳалласига ичимлик сув тармоғи тортиш учун 700 миллион сўм, 22-мактабнинг спорт залини таъмирлаш учун 420 миллион сўм маблағ ютиб олдик. ‘Ташаббусли бюджет’ лойиҳасида республика бўйича энг кўп маблағни қўлга киритган маҳалла бўлдик. Бу ютуқни халқимиз катта хурсандчилик билан кутиб олди. Овоз бериш якунланган куни ярим кечаси бўлишига қарамасдан ғалабани карнай-сурнай билан нишонладик. Байрамга, тўйга айланиб кетди бу тадбир. Барчани кўз ўнгида, очиқ овоз бериш йўли билан ғолиблар аниқланадиган бу лойиҳа халқимизнинг кўнглидаги иш бўлди», — дейди «Катта қашқар» маҳалла фуқаролар йиғини раиси Иброҳим Холматов.
Аҳоли вакилларининг айтишича, маҳалланинг қишда лой-кўлмак, ёзда чангга ботадиган ички йўллари узоқ йиллардан бери асфальт кўрмаган. Устига-устак, ҳудудда мактаб ва болалар боғчаси жойлашган. Ёғингарчилик вақтида бу йўллардан юриш нафақат ёш болаларга, балки катталарга ҳам бирдек қийинчилик туғдирган. «Ташаббусли бюджет»дан ютиб олинган 1 миллиард 80 миллион сўм эвазига маҳалладаги тўрт километр ички йўллар асфальтланади.
«Маҳалламиздаги ички йўлларнинг аксарияти таъмирга муҳтож. Мана шу кўчалар охирги марта қачон асфальт қилингани ёки таъмирланганини билмайман. Кўчаларимиз ёзда чангга, қишда лойга ботади. Бу ерда болалар боғчаси, мактаб бор. Болалар, уларни боғчага олиб келадиган ота-оналар, мактаб ўқувчиларига ёғин-сочинли кунларда бу йўллардан юриш қийинчилик туғдиради. Шунинг учун, ‘Ташаббусли бюджет’ лойиҳаси ҳақида эшитиб, порталга маҳалламиз кўчаларини таъмирлаш бўйича таклиф киритдик. Туман бўйича энг кўп овоз тўплаб, 1 миллиард 80 миллион сўм маблағ ютиб олдик. Овоз тўплаш жараёни осон кечмади. Йигирма кун давомида кеча-ю кундуз ҳаракат қилдик. Кўчама кўча, хонадонма-хонадан юриб овоз йиғдик. Аввал маҳалладаги, кейин тумандаги уйларга бирма-бир кириб чиқдик. Ҳатто, овоз тўплаш учун Андижон, Наманган ва Тошкент вилоятларига ҳам бориб келдик. Қаерда одам кўп тўпланса, ўша ерга биз ҳам етиб бордик. Юзлаб, минглаб одам тўпланадиган концерт дастурларига, футбол ўйинларига бориб овоз тўплашга ҳаракат қилдик. Бошида бу ишимизга шубҳа билан қараган, ишонмаган одамлар кўп бўлди. Кўпчилик шунча пулни сизларга ким бериб қўярди, бекорга овора бўляпсизлар деди. Хонадонларга кирганда, гап эшитиб, қувиб юборилган пайтларимиз ҳам бўлди. Мана, худога шукур, юзимиз ёруғ бўлди, лойиҳада ютиб чиқдик. Хурсандчилигимиз чексиз», — дейди «Катта қашқар» маҳалласида яшовчи фуқаро.
«Пастки дашт» маҳалласи аҳолиси узоқ йиллардан бери ичимлик сув муаммосидан азият чеккан. Маҳаллада яшовчи фуқаролар сувни қарийб икки километр масофадан ташиб келган. Ушбу муаммога ҳам ташаббусли бюджет жараёни ечим бўлди. Энди 700 миллион сўм маблағ эвазига маҳаллада янги қудуқ қазилиб, уч минг метр ичимлик сув тармоғи тортилади. Натижада ҳудуддаги 100 дан ортиқ хонадон тоза ичимлик сув билан таъминланади.
«‘Пастки дашт’ маҳалласида анча йиллардан бери ичимлик сув муаммоси бор эди. Ё узоқ масофадан ташиб келардик ё ариқдаги сувдан ичардик. Шунинг учун ‘Ташаббусли бюджет’ лойиҳасида ўз таклифимиз билан қатнашдик. Ёшларимиз ҳаракат қилишиб, уйма уй юришиб, овоз йиғишди. 700 миллион сўм ютиб олдик. Жуда хурсанд бўлдик. Шу ишни бошида турганларни кўплашиб дуо қилдик. Энди бу маблағга 3 километр жойга ичимлик сув тармоғи тортамиз», — дейди маҳалла фаоли Раҳимжон Усмонов.
Бундан ташқари, «Катта қашқар» маҳалласида жойлашган 22-мактаб ўқитувчилари ва ота-оналар ҳамжиҳатликда спорт зали таъмири учун 420 миллион сўмлик лойиҳани ютиб олди.
Ўзбекистон тумани «Кўл элаш» маҳалласи аҳолиси ўз кўчалари таъмири учун билдирган таклифлари овоз бериш жараёнида ғолиб бўлганини тантана қилди.
Маҳалла раиси Шуҳратжон Раҳмоновнинг айтишича, фуқаролар йиғинида олтита кўча мавжуд. Маҳалладаги 14 километрдан ортиқ ички йўлларнинг тўққиз чақиримига умуман асфальт ётқизилмаган. «Ташаббусли бюджет» лойиҳасида ютиб олинган 900 миллион сўм эвазига маҳалланинг 2 минг 500 метр ички йўллар асфальт қилинади.
Шу маҳаллада яшовчи Шаҳбоз Мақсудовнинг таъкидлашича, овоз йиғиш жараёнида ёшлар ҳам фаол ҳаракат қилган. Ижтимоий тармоқларда махсус гуруҳлар очиб, хонадонма-хонадон юриб, овоз тўплашган.
«Маҳалламиздаги ички йўллар таъмирга муҳтожлиги сабабли ёши катталар билан маслаҳатлашиб, очиқ бюджет порталига таклиф киритдик. Худога шукур, тўққиз мингга яқин овоз билан туманда биринчи ўринни олдик. Бу натижага эришиш осон бўлмади. Бошида бу лойиҳа нима эканлигини кўпчилик тушунмади. Уйма уй юриб, ҳаммага таклифимизни тушунтириб чиқдик. Туну кун ҳаракат қилиб, 900 миллион сўмлик лойиҳани ютиб олишга эришдик», — дейди Шаҳбоз Мақсудов.
Ўзбекистон тумани молия бўлими ходими Ойбек Тошқўзиевнинг маълум қилишича, туманда ‘Ташаббусли бюджет’ лойиҳасида энг кўп овоз олган 18 та таклиф ғолиб деб топилган.
«Молия вазирлиги томонидан очилган очиқ бюджет («openbudget.uz») портали орқали фуқаролар томонидан туман бўйича 220 та таклиф шакллантирилган. Улардан ишчи гуруҳ томонидан низом талабаларига асосан сараланган 134 та таклиф эгаларига тегишли тартибда хабарнома юборилди. Овоз бериш жараёни якунларига кўра, фуқаролар томонидан 134 таклифга 130 минг 788 та овоз берилди. Энг кўп овоз олган 18 та таклиф ғолиб деб топилди. Ушбу таклифларнинг қиймати 10 миллиард 200 миллион сўмни ташкил этади», — дейди Ўзбекистон тумани молия бўлими ходими Ойбек Тошқўзиев.
Маълумот учун, Фарғона вилояти бўйича фуқаролар томонидан жўнатилган 2 минг 178 та таклифдан умумий қиймати 115,4 миллиард сўм бўлган 204 та таклиф «Ташаббусли бюджет» лойиҳасида ғолиб деб топилган. Овоз бериш жараёнларида 1 миллион 126 минг 754 нафар юртдошимиз қатнашган. Ғолиб деб топилган ташаббуслар сони бўйича Фарғона республика ҳудудлари орасида Тошкент вилоятидан кейин иккинчи ўринни эгаллаган.
Изоҳ (0)