Мактабгача таълим вазири Агреппина Шин Қашқадарёдаги боғчаларда 500 дан ортиқ бўш иш ўринлари борлигини маълум қилди. Бу ҳақда «Дарё»га вилоят мактабгача таълим бошқармаси ахборот хизмати раҳбари Баҳодир Мусаев хабар берди.
Айтилишича, бу ҳақда вазир вилоятга ташрифи давомида Қарши давлат университети талабалари билан мулоқотида айтиб ўтган.
«Вазир Агриппина Шин хоним вилоятга ташриф буюриб, талабалар билан учрашди. Педагогика, психология, хорижий тиллар ва мактабгача таълим йўналиши талабалари билан кечган самимий мулоқотда вазир соҳада кечаётган ислоҳотлар, битирувчиларни иш билан таъминлаш ҳақида сўз юритди. Хусусан, вилоят мактабгача таълим тизимида 500 дан ортиқ вакансиялар мавжудлиги, бу вакансиялар учун мазкур таълим даргоҳида таҳсил олаётган мутахассисларни жалб этиш, битирувчиларнинг иш билан таъминланишини ривожлантириш муҳим эканлигини таъкидлади», — дейди Баҳодир Мусаев.
Учрашувда Мактабгача таълим вазирлиги ва Қарши давлат университети ўртасида ўзаро ҳамкорлик тўғрисида меморандум имзоланган.
«Меморандумга кўра манфаатли мавзулар бўйича маърузалар, учрашувлар ва семинарлар ташкил этиш, талабалар амалиётини ташкил этиш учун доимий ҳамкорлик алоқаларини ўрнатиш, бириктирилган ходимнинг амалиётчи билан ишлаш кўникмасига эга бўлишини таъминлаш ҳамда талабалар бандлигини таъминлашни мувофиқлаштириш мақсадида Карьера марказларини ташкил этиш борасида ҳам ҳамкорлик йўлга қўйилиши айтилди», — дейди масъул.
Қўшимча қилинишича, шу куни Қарши давлат университетида мактабгача таълим йўналиши битирувчилари учун меҳнат ярмаркаси ташкил этилиб, унда 102 нафар талаба иш берувчилар билан шартнома тузишга эришган.
Изоҳ (0)