Toshkent viloyati IIBB JQB Giyohvandlik vositalari bilan qonunga xilof ravishda muomala qilishga qarshi kurashish bo‘limi va uning quyi tizim xodimlari tomonidan o‘tkazilgan tezkor-qidiruv tadbirlari natijasida 10 ga yaqin shaxsdan iborat bo‘lgan jinoyat zanjiri uzildi. Bu haqda viloyat IIBB axborot xizmati xabar berdi.
Xususan, Zangiota tumani “To‘qimachi” mahallasida yashovchi Q.S. (1983-yilda tug‘ilgan) 18 yoshli shartli xaridorga to‘rt dona tarkibida kuchli ta’sir qiluvchi modda bo‘lgan dori vositasini 250 ming so‘mga sotayotgan vaqtida xolislar ishtirokida ushlangan. Shuningdek, uning yonidan 10 dona shu turdagi dori vositasi daliliy ashyo sifatida rasmiylashtirilib olingan.
Shu tariqa boshlangan tezkor tadbir davom ettirilib, ushbu shaxs va boshqalarni dori bilan ta’minlayotgan Uchtepa tumanida yashovchi 42 yoshli Javlon, 52 yoshli Baxtiyor, Olmazor va Yunusobod tumanida yashovchi 25 va 27 yoshli Rustam hamda Muhammad, Toshkent tumanida yashovchi 44 yoshli Sherzod, 31 yoshli Jasur ismli shaxslar ham shartli xaridorga dorilarni sotayotgan vaqtida ushlangan.
Shuningdek, Chilonzor tumanidagi dorixonalardan birida sotuvchi bo‘lib ishlovchi 24 yoshli Javohir esa 200 dona shu kabi kuchli ta’sir qiluvchi dorini 3 million so‘mga sotgan vaqtida qo‘lga olingan. Uning avtomashinasidan 590 dona shu turdagi dori vositalari daliliy ashyo sifatida olingan.
O‘tkazilgan tezkor-qidiruv tadbirlari natijasida, 9 nafar shaxs qo‘lga olingan bo‘lsa, ulardan bozor narxi 34 million so‘mga teng bo‘lgan, jami 1 351 dona kuchli ta’sir qiluvchi dori vositasi noqonuniy muomaladan olingan. Hozirda holat yuzasidan tergov harakatlari olib borilmoqda.
Avvalroq DXX Buxoroda giyohvand moddani 2,5 ming dollarga sotishga uringan Afg‘oniston fuqarosini ushlagani, Toshkentda Farmatsevtika instituti talabasi psixotrop moddalarni sotish bilan shug‘ullangani uchun 4 yilga qamalgani to‘g‘risida xabar berilgandi.
Izoh (0)