Ukrainaning Rossiya tomonidan bosib olingan Mariupol shahridan 20 kilometr uzoqlikdagi Mangush posyolkasida ommaviy qabr topildi. Uzunligi 300 metrdan ortiq bo‘lgan xandaqning sun’iy yo‘ldoshdan olingan tasvirlari Ozodlik radiosining “Sxemi” loyihasi tomonidan nashr etilgan.
Mariupol meri maslahatchisi Petr Andryushchenkoning so‘zlariga ko‘ra, ushbu posyolkada rus harbiylari halok bo‘lgan mariupolliklarni ommaviy ko‘mib yuborgan.
Mangushdagi xandaq taxminan mart oyining oxirida paydo bo‘lgan. 23-mart kungi sun’iy yo‘ldosh tasvirida qabr hali yo‘q edi. 29-martdagi suratda uzunligi 300 metrdan oshiq xandaq paydo bo‘lganini ko‘rish mumkin. 9-aprel kuni sun’iy yo‘ldoshdan olingan so‘nggi suratda xandaq qisman ko‘milgan va kengaytirilgan.
Mariupol shahar kengashi ommaviy qabrga shaharning uch mingdan to‘qqiz minggacha aholisi ko‘milgan bo‘lishi mumkin, deb hisoblamoqda. Rasmiylar xandaqning hajmini Buchadagi ommaviy qabr bilan solishtirib shunday xulosaga kelgan (Buchada cherkov yaqinida 14 metrlik xandaqdan 70 kishining jasadi topilgan). Kengash ma’lumotlariga ko‘ra, Mangushdagi qabr hajmi Buchadagi qabrdan 20 baravar katta.
“XXI asrning eng katta harbiy jinoyati Mariupolda sodir etildi. Bu yangi Babiy Yar (Kiyev shimoli-g‘arbidagi jarlik, 1941–43-yillarda nemis fashistlari tomonidan tinch aholi va sho‘ro harbiy asirlari qatliom qilingan joy — tahr.). O‘shanda Gitler yahudiylarni, lo‘lilarni va slavyanlarni o‘ldirgandi. Hozir esa Putin ukrainaliklarni qirmoqda”, — dedi shahar meri Vadim Boychenko.
Mavzuga doir: Kiyev tinch aholi va harbiylarni qutqarish uchun Mariupolda muzokaralar o‘tkazish taklifi bilan chiqdi
Rasmiy ma’lumotlarga ko‘ra, mart oyi o‘rtalariga kelib, kommunal xizmatlar Mariupolning turli qismlari va shahar chekkasida 5000 ga yaqin odamni dafn qilgan. “Konservativ hisob-kitoblarga ko‘ra, Mariupolda Rossiya armiyasi tomonidan o‘ldirilganlarning umumiy soni 22 ming kishini tashkil etadi”, — dedi shahar kengashi.
Izoh (0)