Ўзбекистонда суриштирув ва тергов ҳаракатларида интизомни бузгани учун ички ишлар органларининг 7 нафар ходимига чора кўрилган. Бу ҳақда АОКАда ўтказилган брифингда Олий Мажлиснинг Инсон ҳуқуқлари бўйича вакили ахборот хизмати раҳбари Фотима Мадраҳимова маълум қилди.
Маълум қилинишича, 2021 йил давомида эркинлиги чекланган шахслар сақланадиган жойларда мониторинг ўтказилиб, 4,5 мингдан ортиқ шахс билан жамоавий ва 758 нафар шахс билан якка тартибда суҳбат ўтказилган.
Қайд этилишича, омбудсман номига ёпиқ муассасаларда сақланаётган шахслар, уларнинг яқин қариндошлари ҳамда адвокатлари томонидан 6 104 та мурожаат келиб тушган. Уларнинг 2 119 таси бевосита ёпиқ муассасаларда сақланаётган шахсларнинг мурожаатларидир.
Шикоятлар юзасидан ўтказилган хизмат текшируви якунларига кўра, 4 та ҳолатда суриштирув ва тергов ҳаракатларида интизомни бузгани учун ички ишлар органларининг 7 нафар ходимига чора кўрилган.
Омбудсман томонидан қийноқларнинг олдини олиш бўйича амалга оширилган мониторинг ташрифлари юзасидан тайёрланган чораклик таҳлилий ахборотлар ва йиллик маъруза Олий Мажлис палаталарига тақдим этилган.
Эслатиб ўтамиз, 2021 йилда Тошкентда «Ўзбекистонда миллий превентив механизмни халқаро стандартлар асосида ривожлантириш истиқболлари» мавзусида ўтказилган халқаро конференцияда инсон ҳуқуқлари бўйича вакил Феруза Эшматова «қамоқхоналарда қийноқ ҳолатларини деярли учратгани йўқ»лигини маълум қилганди.
Изоҳ (0)