Animatsiya studiyalari nafaqat bolalar, balki kattalar uchun ham qiziqarli bo‘lgan multfilm chiqarish o‘z auditoriyasini va daromadini sezilarli darajada oshirishini yaxshi bilishadi. Ammo buni amalga oshirish unchalik oson emas. Kattalarni kartinani tomosha qilishga undashning usullaridan biri multfilmlarni ular tushunadigan ishoralar, hazillar bilan taqdim etishdir, lekin bolalar buni sezishmaydi ham.
“Suv parisi”
Ariel topib olgan odamlar dunyosidan narsalar to‘plamida sham yonida o‘tirgan qiz surati ham bor. Bu Jorj de Laturning “Tavba qilayotgan Mariya Magdalina” asari. Uning tizzasida odamning bosh suyagi bor. Kalla suyagi bolalar multfilmida nima qilyapti?
Ehtimol, kartina Arielning yangi Mariya Magdalina ekaniga ishora qilayotgandir. U ham xuddi Magdalina kabi mallasoch, patriarxat bilan kurashadi va xohish-istaklari uchun tanqid qilinadi.
“Ruhlar olami”
Garchi yoqimsiz bo‘lsa-da, multfilmdagi eng hayratlanarli sahnalardan biri bu Ruhning yuvintirilishi. Bu qisman Xayao Miyazaki shaxsiy tajribasiga asoslangan. Bir kuni u uyi yaqinidagi daryoning tozalanishiga guvoh bo‘ladi.
Yillar davomida daryo tubida juda ko‘p axlat to‘planib qoladi. Uning orasida bir g‘ildiragi suvdan chiqib qolgan eski velosiped ham bor edi, lekin shu qadar loy bo‘lganidan uni suvdan chiqarish juda qiyin bo‘lgan. Bu yoqimsiz lahza hayratda qolgan karikaturachining xotirasida saqlanib qoladi va keyinchalik u uni multfilmiga kiritadi.
“Hayvonlar shahri”
Ushbu multfilmda bosh qahramonlar mayda jonivorlar oldiga tashrif buyurishgandagi kulgili bir lahza bor. Darhaqiqat, janob Big – o‘tkir tish, o‘ta tajovuzkor va ochko‘z kemiruvchi.
Bundan tashqari, bu personaj va undagi kadr “Cho‘qintirgan ota” filmidagi Vito Korleonega, xususan, qizining to‘yi sahnasiga ishoradir. Multfilmdagi bu tafsilot bolalar uchun emasligi aniq.
“Olovuddin”
Multfilm davomida Jin turli mashhur kishilarning qiyofasiga kiradi, lekin ularning aksariyati 1992-yilda ham bolalarga tanish emas edi. O‘sha paytdagi mashhur shaxslardan u Arnold Shvarsenegger, Robert de Niro va Jek Nikolsonga parodiya qilgan.
Bolalar tanimagan yana ko‘plab yulduzlar bor, lekin ularning ota-onalari tanishi aniq: Senor Venses, Ed Sallivan, Groucho Marks, Arsenio Xoll, Peter Lorre, Keb Kellouz va boshqalar.
“Sherlok Gnoms”
“Sherlok Gnoms” multfilmida Sherrinford transport kompaniyasining yuk mashinasini ko‘rish mumkin. Sherlok Xolms nomi paydo bo‘lishidan oldin Artur Konan Doylning Sherrinford ismli qahramoni bo‘lgan. Bu nom dastlabki qoralamalarda topilgan. Yozuvchi vafot etganidan keyin boshqa birov tomonidan yozilgan Sherlok Xolmsning turli romanlarida Sherrinford Sherlok va Maykroftning akasi deyiladi.
“Ratatuy”
Asl nusxada janob Jivoderning familiyasi Skinner. U kalamushlar ustida o‘tkazgan tajribalari bilan mashhur bo‘lgan psixolog Burres Frederik Skinner sharafiga nomlangan.
“Kung-fu panda”
“Kung-fu panda” multfilmida ko‘p sahnalarda shaftoli daraxti bor, Ugveyning tayog‘i ham shaftoli yog‘ochidan qilingan. Gap shundaki, Xitoy madaniyatida shaftoli boqiylik ramzi hisoblanadi. Shaftoli daraxtining gullari va barglari Daoss afsunida qo‘llanadi. Shaftoli daraxtining yog‘ochi yomonlikdan saqlaydi, deb ishoniladi. Yosh tomoshabinlar bunday ramziylikni deyarli bilishmasa ham kerak.
“Avtomobillar”
“Avtomobillar” (2006) filmida Luijining davlat raqami 44,5-10,8. Bu Italiyaning Modena shahridagi Ferrari zavodining koordinatalari.
“Dambo”
1941-yilda ekranlarga chiqqan “Dambo” multfilmida sichqoncha Timoti filchaga: “Ko‘pchilik qulog‘i kattalar mashhur bo‘lib ketadi!” deganida, u katta quloqlari bilan tanilgan “Gollivud qiroli” Klark Geyblni nazarda tutadi.
Mavzuga doir:
- “Daydi to‘tining qaytishi”dan “Vinni Pux”gacha: Sovet multfilmlarining siz e’tibor bermagan yashirin ma’nolari
- Namoyishidan 20 yil o‘tib ham tomoshabinlarning sevimli multfilmi bo‘lib qolayotgan “Muzlik davri” kartinasi haqida qiziqarli ma’lumotlar
- Ko‘p marta ko‘rgan bo‘lsangiz ham sevimli multfilmlaringizdagi siz payqamagan holatlar (foto)
Izoh (0)